News

የአካል ጉዳተኞች ተጠቃሚነት እያደገ የመጣ ቢሆንም አሁንም አሠራራችንን መፈተሽ እና ከሚመለከተው አካላት ጋር ተቀናጅቶ መሥራት ይጠበቅብናል
ክብርት ወ/ሮ ሙፈሪሃት ካሚል
የሥራና ክህሎት ሚኒስትር
የሥራና ክህሎት ሚኒስቴር አመራርና ሠራተኞች ዓለም ዓቀፍ የአካል ጉዳተኞች፣ የህጻናት፣ የፀረ ፆታዊ ጥቃት (ነጭ ሪቫን) እና የአለም የኤድስ ቀንን በጥምረት አክብረዋል፡፡
በፕሮግራሙ የመክፈቻ ንግግር ያደረጉት የሥራና ክህሎት ሚኒስቴር ሚኒስትር ክብርት ወ/ሮ ሙፈሪሃት ካሚል ዕለቶቹን አስመልክቶ በሚተላለፉት መልዕክቶች ግንዛቤን ከመጨበጥ ባሻገር የዕለት ተዕለት ህይወታችን አካል ማድረግ እና የአስተሳሰብ ለውጥ ማስፈን ያስፈልጋል ብለዋል፡፡
በሥራ ዕድል ፈጠራ፣ በክህሎት ልማት እና በሰላማዊ ኢንዱስትሪ ግንኙነት አኳያ የአካል ጉዳተኞችን ተጠቃሚነት እያደገ የመጣ ቢሆንም አሁንም ተጨማሪ ሥራ የሚጠይቁ ጉዳዮች በመኖራቸው አሠራራችንን መፈተሸ እና ከሚመለከተው ተቋም ጋራም ተቀናጅቶ መስራት እንደሚያስፈልግ አብራርተዋል፡፡
የክህሎት ልማት ሥራችን አካል ጉዳተኞችን በሚጠበቀው ደረጃ ማካተት እንዲችል ሥርዓተ ስልጠናችንን መፈተሽ፣ ምቹ የማሰልጠኛ መርጃ መሳሪያዎችን በተገቢው መልኩ ማደራጀትና ጊዜውን የዋጀ ቴክኖሎጂን ተግባራዊ ማድረግ ያስፈልጋል ብለዋል፡፡
በመድረኩ አካል ጉዳተኝነትንና ኤች አይቪ ኤድስን አስመልክቶ ከአካል ጉዳተኞች ፌዴሬሽንና ከጤና ጥበቃ ሚኒስቴር በመጡ ባለሙያዎች ቀርቦ ውይይት ተደርጎበታል፡፡

የህዝብ አገልግሎቱን ፈጠራን ማዕከል ያደረገና መፍትሄ አመንጪ እንዲሆን ማስቻል
እንደ ሀገር ምንፈልገውን ለውጥ ለማምጣት የህዝብ አገልግሎትን ፈጣን፣ ቀልጣፋና ከብልሹ አሠራሮች የፀዳ ማድረግ ወሳኝ ነው፡፡ ይህን መሰሉን የአሠራር ማሻሻያ ዕውን ለማድረግ በኢትዮጵያ የመጀመሪያ የሆነው የአገልግሎት አሰጣጥ ሥርዓት የህዝብ አገልግሎት የፈጠራ ማዕከል (public sector innovation lab) በሚል ስያሜ በሥራና ክህሎት ሚኒስቴር ተቋቁሞ ወደ ሥራ ገብቷል።
ፈጠራን፣ አዳዲስ ሃሳቦችን በማፍለቅና አዳዲስ ሃሳቦችን ተግባራዊ በማድረግ ውጤታማ የህዝብ አገልግሎት ለመስጠት ያለመውን የዚህን ሥርዓት ተግባራዊነት ለማረጋገጥ የሚያስችሉ የመሰረተ ልማት ግንባታን ጨምሮ የአሠራር ሥርዓት የመዘርጋትና ተገቢውን መዋቅር የማደራጀት ሥራ በሚኒስቴር መ/ቤቱ ሲሠራ ቆይቷል፡፡
በአሁኑ ጊዜም የሥራና ክህሎት ሚኒስቴር ከየሥራ ክፍሉ ለተውጣጡ የተለያዩ ባለሙያዎች በቀጣይ አሠራሩን ሙሉ ለሙሉ ተግባራዊ ለማድረግ የሚያስችላቸውን ስልጠና በመስጠት ላይ ይገኛል፡፡
የስልጠናው ዋና አላማ በሚቀጥሉት አመታት ውስጥ 500 ችግር ፈቺና መፍትሔ አመንጪ የህዝብ አገልግሎት ፈጣሪ አሸናፊዎችን መፍጠር ነው፡፡
ለአንድ ወር የሚቆየውን ይህ ስልጠና በመጀመሪያዎቹ ሦስት ቀናት የህዝብ አገልግሎት ፈጠራን በተመለከቱ እሳቤዎች (በ system thinking, feature thinking, design thinking, እና innovation ላይ) በማተኮር ይሰጣል፡፡
በቀሩት ቀናቶች ሰልጣኞች በየሥራ ክፍላቸው ውስጥ በተጨባጭ የሚያጋጥሙ ችግሮችን እንዲለዩና ፈጠራ በታከለበት መልኩ መፍትሔዎችን እንዲያመነጩ ይጠበቃል፡፡ የቀረጿቸው የመፍትሔ ሃሳቦች ከተመዘኑና ከተገመገሙ በኋላም የሃሳቡ ባለቤቶች የምስክር ወረቀት ባለቤት እንደሚሆኑም ተገልጿል፡፡
ስልጠናው በቀጣይም ለክልሎች፣ ለዞኖች፣ ለፌዴራል እና ለተጠሪ ተቋማት የሚሰጥ ይሆናል፡፡

ኢንስቲትዩቱ ሰዎችንና ተቋማትን የሚቀይር ሥራ የሚሰራ ትልቅ የሀገር ሀብት ነው
የተከበሩ ዶ/ር ነገሪ ሌንጮ
የሕዝብ ተወካዮች ምክር ቤት የሰው ሃብት ልማት፣ ሥራ ስምሪት እና ቴክኖሎጂ ጉዳዮች ቋሚ ኮሚቴ ሰብሳቢ
የሕዝብ ተወካዮች ምክር ቤት የሰው ሃብት ልማት፣ ሥራ ስምሪት እና ቴክኖሎጂ ጉዳዮች ቋሚ ኮሚቴ በሥራና ክህሎት ሚኒስቴር እያደረገ የሚገነውን የክትትልና የቁጥጥር ሥራ ቀጥሎ በኢንተርሪነርሺፕ ልማት ኢንስቲትዩት የመስክ ምልከታ አድርጓል፡፡
የኢንስቲትዩቱ አጠቃላይ የሥራ እንቅስቃሴ፣ የተገኙ ውጤቶች እና የቀጣይ የትኩረት አቅጣጫዎች ላይ ገለፃ ቀርቦ ውይይት ተካሂዷል።
የቋሚ ኮሚቴው ሰብሳቢ የተከበሩ ዶክተር ነገሪ ሌንጮ፣ የመስክ ምልከታው ዓላማ የኢንስቲትዩቱን አጠቃላይ የሥራ እንቅስቃሴ ተመልክቶ ተግዳሮቶችን መፍታት እንደሆነ አመላክተዋል፡፡
ከቢሮ አደረጃጀት ጀምሮ ኢንስቲትዩቱ በብዙ ቦታዎች ያልተለመደና ለሥራ ምቹ የሆነ ከባቢ መፍጠር መቻሉን አንስተው፤ አፈፃፀሙም ትልቅ ነገርን አስቦ በማቀድ፤ አቅዶም በመተግባር የሚመጣ መሆኑን አስረድተዋል፡፡
ኢንስቲትዩቱ ሰዎችንና ተቋማትን የሚቀይር ሥራ የሚሰራ ትልቅ የሀገር ሀብት እንደሆነም የተከበሩ ዶ/ር ገልፀዋል፡፡
ተግዳሮቶችን ወደ ዕድል በመቀየርና ፀጋዎቻችንን በአግባቡ በማልማት እንደ ሀገር ወደፊት እንዳንሄድ ያደረጉንን እንቅፋቶች ሁሉ እንድናልፍና ወደ ግባችን እንድንደርስ የሚያደርግ በመሆኑ አቅሙን ማባዛትና ሥራውን ማስፋት እንደሚገባውም ጠቁመዋል፡፡
ሀገርና ተቋም የሚቀየረው ትክክለኛ አመራር ሲኖር ነው ያሉት የተከበሩ ነገሪ ሌንጮ፤ ሰርተው የሚያሰራና የማያሰሩ ቢሮክራሲዎችን የሚገሩ አመራሮችን ለማፍራት የተጀመረው ሥራ ተጠናክሮ መቀጠል እንዳለበት አሳስበዋል፡፡
የቋሚ ኮሚቴው ምክትል ሰብሳቢ የተከበሩ ዶ/ር ቤተልሔም ላቀው በበኩላቸው፤ በተቋሙ ሪፖርት ችግር አለመቅረቡን ገልጸው ይህም ችግሮችን ወደ መልክም እድልነት የሚቀይር ተቋም መሆኑን በግልጽ የሚያሳይ ነው ብለዋል፡፡
ኢንስቲትዩቱ ባልተለመደ መንገድ በመሄድ ውጤት እያመጣ መሆኑን ገልፀው ውጤቱን በሀገር አቀፍ ደረጃ ለማስፋት በተቋማት አመራሮች ላይ የተጀመሩ ሥራዎች ተጠናክረው መቀጠል እንዳለባቸው አመላክተዋል፡፡
የኢንተርፕሪነርሺፕ ኢንስቲትዩት ዋና ዳይሬክተር ክቡር ዶ/ር ሀሰን በበኩላቸው፣ ኢንስቲትዩቱ የኢንተርፕሪነርሺፕ ስነ-ምህዳሩን በማስፋት ሴቶች፣ ወጣቶች እና አካል ጉዳተኞችን ተጠቃሚ ከማድረግ ባሻገር የተቋማት አመራሮችን አቅም ከማሳደግ አኳያ እያደረገ ያለውን ጥረትና የተገኙ ውጤቶችን አብራርተዋል፡፡
በኢንተርፕሪነርሺፕ ስነ-ምህዳር ግንባታ ኢትዮጵያ ምንም ከማትታወቅበት ምራፍ ወጥታ በዚህ ዓመት በዓለም አቀፍ መድረክ የመጀመሪያ ደረጃ መያዟንም ጠቁመዋል፡፡
በቀጣይ የዓለማችን ታላለቅ ባለሀበቶችና ኢንቨስተሮች የሚሳተፉበትን የኢንተርፕሪነርሺፕ ኮንግረንስ ለማዘጋጀት ጥያቄ መቅረቡንም አንስተው ለስነ-ምህዳር ግንባታው ቋሚ ኮሚቴው ሲያደርግ የነበረውን ድጋፍም አጠናክሮ እንዲቀጥል ጠይቀዋል፡፡

በኦሮሚያ ክልል ወጣቶችን በክህሎት በማብቃት ወደ ሥራ እንዲገቡ እየተደረገ መሆኑን የክልሉ የሥራ ዕድል ፈጠራና ክህሎት ቢሮ ገለጸ
ቢሮው የወጣቶችን ተወዳዳሪነት ለማሳደግ የተግባርና የንድፈ ሀሳብ ስልጠናዎችን በቅንጅት እየሰጠ መሆኑን አስታውቋል።
“ዛሬን ለነገ” በሚል የብቃት ፕሮጀክት በአዳማ ከተማ የሥራ ላይ የተግባር ስልጠና የወሰዱ 1ሺህ 799 ወጣቶች ተመርቀዋል።
የኦሮሚያ ክልል የሥራ ዕድል ፈጠራና ክህሎት ቢሮ ሃላፊ እ/ር ኤባ ገርባ እንደገለፁት፤ ከቴክኒክና ሙያ ኮሌጆች ጋር በመቀናጀት ወጣቶችን በክህሎት ለማብቃት የአጫጭርና ረጃጅም ጊዜ ስልጠናዎች እንዲወስዱ በማድረግ ወደ ሥራ እንዲገቡ ተደርጓል።
የሥራ ላይ ስልጠናው በንድፈ ሀሳብና በተግባር የተደገፈና የወጣቶቹን የሥራ ተወዳዳሪነት ማሳደግ የሚያስችሉ መሆናቸውን አንስተዋል።
በክልሉ የዚሁ ተግባር አካል የሆነው የወጣቶችን የሥራ ብቃት ማሳደግን ዓላማ ያደረገ “ዛሬን ለነገ” በሚል የብቃት ፕሮጀክት የሥራ ላይ ሙያዊ ስልጠና በአዳማ፤ በሻሸመኔ እና በጅማ መሰጠቱን ገልጸው፤ የዛሬው በአዳማ የተከናወነው ምረቃ የዚሁ ጥረት አካል ነው ብለዋል።
የሥራ ላይ ስልጠናውን ከወሰዱ ወጣቶች መካከል 1,799 ውጤታማ በመሆናቸው በኢንዱስትሪዎች የመቀጠር ዕድል ማግኘታቸውንም ተናግረዋል።
ዘገባው የኦሮሚያ ክልል፣ የሥራ ዕድል ፈጠራና ክህሎት ቢሮ ነው

የመንግስት አገልግሎትና አስተዳደር የሪፎርም ሥራው ባለቤት ሠራተኛው ነው፡፡
ክብርት ወ/ሮ ሙፈሪሃት ካሚል
የሥራና ክህሎት ሚኒስትር
የሥራና ክህሎት ሚኒስቴር አመራርና ሠራተኞች በሚኒስቴር መ/ቤቱ የመጀመሪያ ሩብ ዓመት ዕቅድ አፈፃፀምና በመንግስት አገልግሎትና አስተዳደር የለውጥ ሥራው ላይ ውይይት ማድረግ ጀምረዋል፡፡
በመድረኩ የሚኒስቴር መስሪያ ቤቱ የመጀመሪያ ሩብ ዓመት ዕቅድ አፈፃፀምና የመንግስት አገልግሎትና አስተዳደር የሪፎርም ሥራዎች የተግባር ምዕራፍ ዕቅድ ቀርቦ ውይይት ተደርጎበታል፡፡
የሥራና ክህሎት ሚኒስትር ክብርት ወ/ሮ ሙፈሪሃት ካሚል በመድረኩ ላይ ባስተላለፉት መልዕክት፣ ሚኒስቴር መስሪያ ቤቱ የመጀመሪያውን ምዕራፍ በስኬት ማጠናቁን አውስተው ይህን ስኬት ያለሠራተኛው ንቁ ተሳትፎና ርብርብ ማምጣት አይቻልም ነበር ብለዋል፡፡
ሥራው ሀገርን የመገንባት ጉዞ አንዱ አካል በመሆኑ ለብቻ ሳይሆን ሌሎችንም ይዞ መውጣት እንደሚያስፈልግም ጠቁመዋል፡፡
የመንግስት አገልግሎትና አስተዳደር የሪፎርም ሥራው ባለቤት ሠራተኛው ነው ያሉት ክብርት ሚኒስትር ሁሉም ይህን ተገንዝቦ የትግበራ ምዕራፉን እቅድ በማዳበር በባለቤትነት አልቆ ለመፈፀም መዘጋት እንዳለባቸው አሳስበዋል፡፡
በሚኒስቴር መስሪያ ቤቱ መሰብሰቢያ አዳራሽ እየተካሄደ የሚገኘው የውይይት መድረክ በመደበኛውና የሪፎርም ሥራዎች የቀጣይ አቅጣጫዎች ላይ ውይይት ነገም ቀጥሎ የሚካሄድ ይሆናል፡፡

የመንግስት አገልግሎትና አስተዳደር ሪፎርም ትግበራ ሀገር የመሥራት ኃላፊነታችንን በብቃት እንድንወጣ የሚያግዝ ነው፡፡
ክብርት ወ/ሮ ሙፈሪሃት ካሚል
የሥራና ክህሎት ሚኒስቴር ሚኒስትር
በሥራና ክህሎት ሚኒስቴር ለሁለት ተከታታይ ቀናት ሲካሄድ የቆው የአፈፃፀም ግምገማ፣ የመንግስት አገልግሎትና አስተዳደር ሪፎርም ትግበራ ምዕራፍ እቅድ ትውውቅ እና የቀጣይ የትኩረት አቅጣጫዎች መድረክ አመራርና ሠራተኛው ለቀጣይ ሥራዎች ያላቸውን የላቀ ቁርጠኝነት ያሳዩበት ባለዘጠኝ ነጥብ የአቋም መግለጫና ቃለ መሐላ በመፈፀም ተጠናቋል፡፡
በማጠቃለያ ላይ የቀጣይ ሥራዎች መመሪያ የሰጡት የሥራና ክህሎት ሚኒስቴር ሚኒስትር ክብርት ወ/ሮ ሙፈሪሃት ካሚል ሚኒስቴር መስሪያ ቤቱ የራሱን አዳዲስ እሳቤዎች ቀርፆ በለውጥ አስተሳሰብ መቋቋሙ የመንግስት አስተዳደር ሪፎርምን በተገቢው ደረጃ ለመተግበር መሰረት መጣሉን አስረድተዋል፡፡
አዳዲስ እሳቤዎቹ በክህሎት ልማት ፣ በሥራ ዕድል ፈጠራና በአሠሪና ሠራተኛ ዘርፍ ተጨባጭ ውጤት ማስገኘታቸውን የገለፁት ክብርት ሚኒስትር የሪፎርሙ ትግበራው ሀገር የመሥራት ኃላፊነታችንን በብቃት እንድንወጣ የሚያግዝ ነው ብለዋል፡፡
የአገልግሎት ጥራትን ለማሻሻል በተሰጠው ትኩረትም ሚኒስቴር መ/ቤቱን የጥራት አመራር (ISO 9001 : 2015) ሰርተፍኬት ባለቤት ማድረግ መቻሉንም ገልፀዋል፡፡
የዜጎችን ፍላጎት በሚመጥን መልኩ ከሚኒስቴር መ/ቤቱ ሰፋፊ ሥራዎች የሚጠብቁ እንደመሆኑ የመንግስት አገልግሎትና አስተዳደር ሪፎርም መደበኛ ሥራዎችን በተቀላጠፈና በተፋጠነ መንገድ በማሳካት የተገልጋዮችን እርካታ ለማረጋገጥ ጉልህ አበርክቶ እንደሚኖረው ጠቁመዋል፡፡
በሪፎርሙ ሂደት ራሳችንን ለማስተማር የነበረን ዝግጁነት የዝግጅት ምዕራፉን በስኬት ለማጠናቀቅ አስችሎናል ያሉት ክብርት ሚኒስትር የተግባር ምዕራፍ ሥራዎች ግልፅነትንና ባለቤትንትን በሚያጎለብት መልኩ በየደረጃው በሚገኙ አመራሮችና ፈፃሚዎች እንደሚተገበሩ አብራርተዋል፡፡
የሪፎርም ትግበራው ሠራተኞች በሠሩት ልክ ዕውቅና የሚያገኙበት፣ የማትጊያ ሥርዓት የሚተገበርበትና፣ በሚኒስቴር መስሪያ ቤቱ የተጀመሩ የዲጂታላይዜሽን ሥራዎች የበለጠ ተጠናክረው የሚቀጥሉበት መሆኑንም ክብርት ሚኒስትር ሙፈሪሃት ካሚል አስረድተዋል፡፡
ሪፎረሙን በውጤታማነት መተግበር እንዲቻል ለሠራተኞች የተሰጡ የቅድመ ምዘና ውጤቶችን መሰረት ያደረጉ ሥልጠናዎች በቀጣዮቹ ሳምንታት እንደሚሰጡና ጠንካራ የሜንቶርሺፕ ስርዓት እንደሚተገበርም ተገልጿል፡፡
የጥራት ሥራ አመራር ስርዓት ትግበራውን በውጤታማነት ማስቀጠል፣ ችግር ፈቺና መፍትሔ አመንጪ ሃሳቦችን በማፍለቅ ቀልጣፋና ውጤታማ የአሠራር ሥርዓት ለመተግበር በሚኒስቴር መ/ቤቱ የተቋቋመውን (public service innovation lab) የማጠናከር ሥራ በትኩረት እንደሚሠራም አሳውቀዋል፡፡

ብሩህ ሀገር አገፍ የፈጠራ ሃሳብ ውድድር መካሄድ ጀመረ
የሥራና ክህሎት ሚኒስቴር ከኢንተርፕረነርሺፕ ልማት ኢንስቲትዩት እና ከኤስ ኤን ቪ ሊዌ ፕሮግራም ጋር በትብብር ያዘጋጀው 6ኛው ሀገር አቀፍ ብሩህ የፈጠራ ሃሳብ ውድድር በዛሬው እለት ተጀምሯል፡፡
የሥራና ክህሎት ሚኒስትር ዴኤታ ክቡር አቶ ሰለሞን ሶካ የቡት ካምፕ ስልጠናና ውድድር መድረኩ ባስጀመሩበት ወቅት እንደገለጹት ብሩህ ኢትዮጵያ የፈጠራ ሃሳብ ውድድር ከአካባቢያቸው አልፈው ሀገርን የመቀየር አቅም ያላቸው፣ ለበርካታ ዜጎች የሥራ ዕድል የሚፈጥሩ ትላልቅ ሃሳቦች የሚለዩበት እና አሸናፊ የሆኑ ሀሳቦች በተደራጀ መንገድ ወደ ካምፓኒ እንዲሸጋገሩ አቅማቸው የሚገነባበት ነው ብለዋል፡፡
ባለፉት 5 ዓመታት በተካሄዱ የፈጠራ ሃሳብ ውድድሮች ከ12 ሺህ በላይ አዳዲስ ሃሳቦች በፌዴራል ደረጃ ቀርበው ችግር ፈቺና መፍትሄ አምጪ ሆነው የተገኙ 1ሺህ 350 የሚሆኑ የፈጠራ ሃሰቦች ለሽልማት መብቃታቸውን ገልጸዋል፡፡
በማወዳደር እና በመሸለም የማይቆመው ብሩህ-ኢትዮጵያ፤ በውድድሩ ከተሸለሙት መካከል 580 የሚሆኑ የፈጠራ ሃሳብ ባለቤቶች ኢንተርፕራይዝ አቋቁመው በአሁን ወቅት ለበርካታ ዜጎች የሥራ እድል መፍጠር እንደቻሉም አስታውቀዋል፡፡
በዘንድርሮ ብሩህ- ኢትዮጵያ 2018 ከመላው የኢትዮጵያ ክፍል የተውጣጡ 251 የሚሆኑ የፈጠራ ሃሳብ ባለቤቶች እንደሚሳተፉ የጠቆሙት ሚኒስትር ዴኤታው በዘርፉ ባለሙያዎች ተገምግመው የሚያሸንፉ የፈጠራ ሃሳቦች ወደ ካምፓኒ እንዲሸጋገሩ ከባለድርሻ አካላት ጋር በትኩረት እየተሰራ እንደሚገኝ ጠቁመዋል፡፡
ለቀጣይ 10 ቀናት በሚቆየው በዚህ የቡት ካምፕ ስልጠናና ውድድር የሚሳተፉ የፈጠራ ሃሳብ ባለቤቶች ሃሰባቸውን ይበልጥ ማበልጸግ የሚያስችላቸው ስልጠና፣ የልምድ ልውውጥ እና የኢንዱስትሪ ጉብኝቶችም የተካተቱበት መሆኑን ተመላክቷል፡፡

የሀገር ብልጽግናን የሚያፋጥኑ አዳዲስ የፈጠራ ሃሳቦች ለመደገፍና ኮትኩቶ ወደ ውጤት ለመቀየር ተቀናጅቶ መስራት ይገባል፡፡
ክቡር አቶ ሰለሞን ሶካ
የሥራና ክህሎት ሚኒስቴር ሚኒስትር ዴኤታ
የሥራና ክህሎት ሚኒስትር ዴኤታ ክቡር አቶ ሰለሞን ሶካ አዳዲስ የፈጠራ ሃሳቦች መደገፍና ወደ ውጤት መቀየር በሚያስችሉ ጉዳዮች ዙሪያ ከፋይናንስ ተቋማት እና ከልማት አጋሮች ጋር ተወያይተዋል፡፡
ሚኒስትር ዴኤታው በውይይቱ ላይ እንደገለጹት ሀገር ወደ ብልጽግና የሚያሻግሩ ትላልቅ ካምፓኒዎች ለመፍጠር መሰረት የሚጥሉ አዳዲስ የፈጠራ ሃሳቦችን ለመደገፍ እና ወደ ውጤት ለመቀየር በተናጠል ከመሄድ ይልቅ ተቀናጅቶ በጋራ መስራት ይገባል ብለዋል፡፡
የሥራና ክህሎት ሚኒስቴር በመላው ሀገሪቱ የሚገኙ አዳዲስ የፈጠራ ሃሳቦች ብሩህ ኢትዮጵያ- የፈጠራ ሃሳቦች በሚል ከወረዳ ጀምሮ በየደረጃው አወዳድሮ በመለየት ወደ ፌዴራል የሚያልፉ ሀሳቦች ላይቶ የማሰልጠን፣ የመሸለም እና የማብቃት ስራ ሲሰራ መቆየቱንም ገልጸዋል፡፡
እንደ ሀገር እየፈለቁ የሚገኙ አዳዲስ የፈጠራ ሀሳቦች በርካታ ከመሆናቸው የተነሳ ሃሳቦች በሚፈለገው ልክ ደግፎ እና ኮትኩቶ ለሀገር እድገትና ብልጽግና ለመጠቀም የፋይናንስ ተቋማት እና የልማት አጋሮች ሥራውን በማገዝ ሀገራዊ ሀላፊነታቸውን ሊወጡ እንደገባ ጠቁመዋል፡፡
ዘንድሮ በሀገር አቀፍ ደረጃ ከ5 መቶ በላይ የፈጠራ ሃሳቦች መለየታቸውን የገለጹት ሚኒስትር ዴኤታው ከነዚህ መካከል 251 የሚሆኑ የፈጠራ ሀሳቦች ከህዳር 15/2018 ዓ.ም ጀምሮ አቅማቸው የሚገነባበት ቡትካምፕ ይገባሉ ብለዋል፡፡
በዘንድሮ ብሩህ ኢትዮጵያ የፈጠራ ሃሳቦች ውድድር ላይ ተወዳድረው ከሚያልፉት መካከል የተወሰኑት ሀሳባቸውን ወደ ውጤት እንዲቀይሩ በኤስ ኤን ቪ ሊዌ ፕሮግራም(SNV, LIway program) ለመደገፍ መመቻቸቱን ተናግረዋል፡፡
የፋይናንስ ተቋማት እና የልማት ድርጅቶች ቀሪ የፈጠራ ሀሳቦች ወደ ውጤት እንዲቀየሩ በመደገፍ ሀገራዊ ሃላፊነታቸው እንዲወጡም ጥሪ አቅርበዋል፡፡

በታዳሽ ኃይል ዙሪያ የሥልጠና ፕሮግራሞችን መክፈትና አዋጪነት
የኢፌዲሪ ቴክኒክና ሙያ ሥልጠና ኢንስቲትዩት የታዳሽ ሃይል ቴክኖሎጂን ለመጠቀም የሚያስችል የሥልጠና ፕሮግራም ለመክፈት የእሴት ሰንሰለት ትንተናን መሰረት አድርጎ በተሠራ የዳሰሳ ጥናት ላይ ውይይት አካሂዷል፡፡
በጥናቱም ታዳሽ ኃይል ቴክኖሎጂ የሚገኝባቸው አምስት ተፈጥሯዊ ሃብቶችን በተመለከተ ዘርዘር ያለ ማብራሪያ ተሰጥቶባቸዋል፡፡
በዚህም ኢትዮጵያ ወንዞቿን በመጠቀም 45ሺ ሜጋ ዋት የኤሌክትሪክ ኃይል፣ ከ5-6 ኪሎዋት ፐር ሀወር ስኩዌር ሜትር የፀሀይ ሃይል፣ 10ሺ ሜጋ ዋት የንፋስ ሀይል፣ 10ሺ ከጂኦተርማል እና ከ2.8-8.8 ሚሊዮን ቶን በአመት ቆሻሻን ወደ ሀይል በመቀየር ማምረት የምትችል ቢሆንም እስካሁን ጥቅም ላይ የዋለው እጅግ ውሱን መሆኑ ተነስቷል፡፡
በቂ የሰለጠነ የሰው ኃይል አለመኖር፣ የመሰረተ ልማት እጥረት እና የፋይናንስ አቅርቦት ችግር ታዳሽ ኃይልን በበቂ መጠን ጥቅም ላይ ላለመዋሉ ዋንኛ ምክንያት መሆኑ ተጠቅሷል፡፡
የውይይቱ ተሳታፊዎች ‹‹የአለም አቀፍ የነዳጅ ገበያዎች ላይ ጥገኛ መሆንን ትተን በተለይ በአሁኑ ሰአት ኤሌክትሪክ መኪኖችን መጠቀም መጀመራችን ተለዋጭ ኃይሎችን እንድንጠቀም ያስገድደናል በተጨማሪም ታዳሽ ኃይሎች ዘላቂ እና በአጠቃቀም የማይሟጠጡ ስለሆኑ እና ለኢኮኖሚው እድገትም ወሳኝ ሚና ስላላቸው ተመራጭ ናቸው›› የሚል ሃሳብ በስፋት አንስተዋል፡፡
በመሆኑም በሀገራችን የሚገኙ የታዳሽ ኃይል አማራጮችን በማጥናት በአጭር እና በረጅም ጊዜ የሥልጠና ፕሮግራሞችን መክፈት አስፈላጊ መሆኑ በአፅንኦት ተነስቷል፡፡

ምቹ የፋይናንስ ሥርዓት ለስታርት አፕ ቢዝነሶች…
መንግስት ለስራ ፈጣሪዎችና ስታርት አፕ ቢዝነሶች ምቹ የፋይናንስ ስርዓት ዘርግቷል አሉ የሥራና ክህሎት ሚኒስትር ሙፈሪሃት ካሚል።
ሚኒስቴሩ በሥራ ዕድል ፈጠራ ከሚያከናውናቸው ተግባራት መካከል አዳዲስ የፈጠራ ሐሳብ የሚያመነጩ ስራ ፈጣሪዎችና ስታርት አፕ ቢዝነሶችን መደገፍና ለውጤታማነት ማብቃት አንዱ መሆኑን ተናግረዋል፡፡
የዘርፉ ተዋንያን የራሳቸውን ሚና መጫወት እንዲችሉና የፋይናንስ ስርዓቱ ለስራቸው ምቹ እንዲሆን የኢንቨስትመንት ልማት ባንክን ጨምሮ ዘርፉን የሚያጠናክር ስርዓት መዘርጋቱን ጠቁመዋል።
ይህም የሚያጋጥማቸውን የፋይናንስ አቅርቦት ተግዳሮቶችና ስጋቶችን ለመቅረፍ እንደሚያስችል አስረድተዋል።
ወጣቶች ክህሎታቸውንና የፈጠራ ስራዎቻቸውን የሚያጎለብት፣ ሐሳቦቻቸውንም እስከ ትላልቅ ፋብሪካዎች ማድረስ የሚያስችል ድጋፍ እየተሰጣቸው መሆኑን አንስተዋል።
ወጣቶች ያላቸውን የፈጠራ አቅም ወደ ተጨባጭ ውጤት አንዲያሸጋግሩ የሚያስችል ምቹ ምህዳር እየተገነባ መሆኑን ጠቅሰው÷ መንግሥትም ለዘርፉ ትልቅ ትኩረት ሰጥቶ እየሰራ እንደሚገኝ ገልጸዋል።
የዜጎችን የሥራ ዕድል ተጠቃሚነት ለማረጋገጥ በሚደረገው ጥረት ስታርት አፕ ቢዝነሶች ወሳኝ ሚና በመጫወት ለበርካታ ዜጎች የሥራ ዕድል መፍጠሩንም ሚኒስትሯ አመላክተዋል። ዘገባው የፋና ብሮድካስቲንግ ነው።