mols mols

የሥራ ቦታዎችን ምቹነት በማረጋገጥ ምርትና ምርታማነትን ማረጋገጥ ለነገ የማይባል ተልዕኮ ነው
‎
‎ክቡር አቶ ዳንኤል ተሬሳ
የሥራና ክህሎት ሚኒስቴር ሚንስትር ዲኤታ

የሚተገበሩ አሠራሮችን ውጤታማ ለማድረግ በፖሊሲ ንድፍና በተግባራዊ አፈጻጸም መካከል ያለውን ክፍተት መሙላት ወሳኝ መሆኑን ተመላከተ
የሥራና ክህሎት ሚኒስቴር ፐብሊክ ሴክተር ኢኖቬሽን ላብ (PSI Lab) ከአሜሪካ ኤምባሲ እና ከኢትዮጵያ ሳይንስ አካዳሚ ጋር በመተባበር ያዘጋጀው የአቅም ግንባታ ሥልጠና መድረክ በዛሬው ዕለት ተጀምሯል።
የሥልጠናው ዋና ዓላማ ሚኒስቴሩ የዘርፉ ተግዳሮቶችን በጥናትና ምርምር ታግዞ ለመፍታት ያቋቋመውን የፒኤስ አይ ላብን(PSI Lab) የውስጥ አቅም ማጠናከር፣ ተቋሙ ያቀዳቸውን ስትራቴጂካዊ ግቦች ማሳካትና ማዕከሉን ከምርምር ተቋማት ጋር ማስተሳሰር ነው ተብሏል።
በዚህ መድረክ ላይ ከ8ቱ የኢትዮጵያ የምርምር ዩኒቨርሲቲዎችና ከ2ቱ የሳይንስና ቴክኖሎጂ ዩኒቨርሲቲዎች የተወጣጡ የአመራር አካላት እንዲሁም ከሚኒስቴሩና ከፒኤስአይ ላብ የተወጣጡ ሠራተኞችና አመራሮች በመሳተፍ ላይ ይገኛሉ።
በፕሮግራሙ መክፈቻ ላይ የአሜሪካ ኤምባሲ ተወካይ ዶ/ር ጆን ኬለር ባስተላለፉት መልዕክት፤ ኤምባሲው ባለፉት ሦስት ዓመታት 10 የሀገሪቱን የሕዝብ ምርምር ዩኒቨርሲቲዎች ወደ ራስ-ገዝነት ለሚያደርጉት የሽግግር ጉዞ የፖሊሲ ሰነዶችን በማስተካከልና የአመራር አቅም ግንባታ ሥልጠናዎችን በመስጠት ድጋፍ ሲያደርግ መቆየቱን ተናግረዋል፡፡
ሥልጠናው ዩኒቨርሲቲዎች ካጋጠሟቸው ተግዳሮቶችና ስጋቶች በመነሳት፣ ከፖሊሲ ቀረጻ ባለፈ ወደ ትግበራ መሸጋገር የሚችሉበትን ክህሎት ለማስታጠቅ ትልቅ አቅም እንደሚፈጥር ገልጸው ኃላፊነትን ወደታች ለማውረድና (Decentralized) የሚተገበሩ አሠራሮችን ውጤታማ ለማድረግ በፖሊሲ ንድፍና በተግባራዊ አፈጻጸም መካከል ያለውን ክፍተት መሙላት ወሳኝ መሆኑን አስገንዝበዋል።
የኢንተርፕረነርሺፕ ልማት ኢንስቲትዩት ዋና ዳይሬክተር ሀሰን ሁሴን(ዶ/ር) በመድረኩ ላይ ባደረጉት ንግግር፤ ባለፉት ሦስት ዓመታት ከቴክኒክና ሙያ ተቋማት እንዲሁም ከፖሊቴክኒክ ኮሌጆች ጋር የተከናወኑ ሥራዎች በከፍተኛ አመራሩ ባበለቤትነት ስለተመሩ የሚታይ ውጤት ማስመዝገብ መገመራቸውን ገልጸዋል፡፡
ዩኒቨርሲቲዎች በተግባራዊ ምርምር ስራዎቻቸው ማኅበረሰቡንና አካባቢውን ለመለወጥ ትልቅ ተስፋ የሚጣልባቸው ተቋማት በመሆናቸው፣ ከድህነት መውጫና ወደ ብልጽግና መሸጋገሪያ መሰላል የመሆን ሚናቸውን በአግባቡ እንዲወጡ ጥሪ አቅርበዋል።
ዶ/ር ሀሰን አክለውም፤ የኢንተርፕረነርሺፕ ልማት ኢንስቲትዩት ከመንግሥት በጀት የማይቀበል፣ ራሱን በራሱ የሚያስተዳድር ግን ሙሉ በሙሉ የመንግሥት የሆነ ራሱን የቻለ (Autonomous) ተቋም መሆኑን በመጥቀስ፣ ተሳታፊዎች ከዚህ ስኬታማ ተሞክሮ ተቋማዊ ትምህርት መቅሰም እንደሚችሉ አብራርተዋል
የሥራና ክህሎት ሚኒስቴር የፒኤስ አይ ላብ ዋና ሥራ አስፈጻሚ ዶ/ር ጥላሁን በጅቷል በበኩላቸው፤ ሥልጠናው በሲስተም ቲንኪንግ (Systems Thinking)፣ ዲዛይን ቲንኪንግ (Design Thinking)፣ ቼንጅ ማኔጅመንት (Change Management)፣ ትራንስፎርሜሽን (Transformation) እና ስትራቴጂክ ቲንኪንግ (Strategic Thinking) ዙሪያ ላይ ያተኮረ መሆኑን አብራርተዋል።
በአለም አቀፍ አሰልጣኞች ድጋፍ የሚሰጠው ይህ ስልጠና የሚከታተሉ ሰልጣኞች ሥልጠናውን ሲያጠናቅቁ በየተቋማቸው የሚተገብሯቸውን የስትራቴጂክ ዕቅዶችና የተለያዩ የስትራቴጂካዊ ፕሮፖዛሎችን ያዘጋጃሉ ተብሎ ይጠበቃል።

‹‹የሥራ ዕድል ፈጠራን ወደ ሀብት ማፍሪያነት፣ ማኅበራዊ ተቋማትን ደግሞ ወደ ልማት ሞተርነት ለመቀየር የሁሉንም የዘርፉን አስፈፃሚ አካላት ቁርጠኝነትና ትጋት ይጠይቃል››
ክቡር አቶ ሰለሞን ሶካ
የሥራና ክህሎት ሚኒስቴር፣ የሥራ፣ ሥራ ስምሪትና ገበያ ዘርፍ ሚኒስትር ዴኤታ
የሥራ፣ ሥራ ስምሪትና ገበያ ዘርፍ የ2018 ዓመት አፈፃፀምና የ2019 በጀት ዓመት ዕቅድ ላይ ከክልሎች ጋር ውይይት እያካሄደ ይገኛል፡፡
መድረኩን በንግግር የከፈቱት የሥራና ክህሎት ሚኒስቴር የሥራ ፣ ሥራ ስምሪትና ገበያ ዘርፍ ሚኒስትር ዴኤታ ክቡር አቶ ሰለሞን ሶካ የዘርፉን አዲስ እሳቤ መነሻ በማድረግ ለዘመናት የተጠራቀመውን ዕዳ የሚያቃልሉ፣ የዜጎችን አሁናዊ ፍላጎት የዋጁና የመጪውን ዓለም ነባራዊ ሁኔታ መሠረት ያደረጉ ተግባራት በበጀት ዓመቱ መከናወናቸውን ገልጸዋል።
ከእነዚህም መካከል “ክህሎት መር የሥራ ዕድል ፈጠራ” ቀዳሚው መሆኑን ጠቅሰው ሥራ ፈላጊዎች በቴክኒክና ሙያ ተቋማት ልል ክህሎት (Soft Skills) እና ጠጣር ክህሎት (Hard Skills) ታጥቀው ወደ ሥራ እንዲገቡ እየተደረገ መሆኑን ጠቁመዋል።
የቤተሰብ ቢዝነስን በማስፋፋት፣ እሴት አካይ ምርትን በማሳደግ እንዲሁም የመስሪያ፣ የመሸጫና የካፒታል አቅርቦት ችግሮችን በማቃለል ከከ4.9 ሚሊዮን በላይ ዜጎችን ከአዳዲስ የሥራ ዕድሎች ተጠቃሚ ማድረግ መቻሉንም አስታውቀዋል፡፡
በኢኖቬሽን ላይ የተመሠረተ ስልት በመቀየስ ፈጣን የማደግ አቅም ያላቸውን ኢንተርፕራይዞች በቅርበት በመደገፍ ውጤታማነታቸውን ማረጋገጥ መቻሉን የጠቆሙት ክቡር ሚኒስትር ዴኤታው ለመሰል ኢንተርፕራይዞች የተሰጠው ልዩ ትኩረት “ከዳቦ በላይ” የሚለውን አዲስ እሳቤ ለማሳካት ዋነኛ ስልት ሆኖ መገኘቱንም አመላክተዋል፡፡
የሥራ ዕድል ፈጠራን ወደ ሀብት ማፍሪያነት፣ ማኅበራዊ ተቋማትን ደግሞ ወደ ልማት ሞተርነት ለመቀየር የሁሉንም የዘርፉን አስፈፃሚ አካላት ቁርጠኝነትና ትጋት እንደሚጠይቅም በአፅንኦት አንስተዋል፡፡
የሥራና ክህሎት ዘርፍ የሀገራችንን ወደ ላቀ ብልጽግና ለማሸጋገር ያለውን አስተዋፅኦ በሚገባ በመገንዘብ የዘርፉን ተልዕኮዎች በክህሎትና ኢኖቬሽን ለመምራት ሁሉም አስፈፃሚ አካላት ዝግጁ መሆን እንደሚጠበቅባቸው ክቡር አቶ ሰለሞን በንግግራቸው ማጠቃለያ ላይ አሳስበዋል፡፡

የወጣቶችን የሥራ አጥነት ችግር በዘላቂነት ለመቅረፍ በተከናወኑ ተግባራት በሚሊዮን የሚቆጠሩ ወጣቶች ወደ አምራች ኃይልነት መቀየር ተችሏል
ክቡር አቶ ሰለሞን ሶካ
የሥራና ክህሎት ሚኒስቴር የሥራ፣ ሥራ ሥምሪትና ገበያ ዘርፍ ሚኒስትር ዴኤታ
የሥራና ክህሎት ሚኒስቴር ከዓለም ባንክ ጋር በመተባበር የሚተገበረውን “የወጣቶች የሥራ ላይ ልምምድ” ፕሮግራም በላቀ ጥራትና ተጠያቂነት ለመተግበር የሚያስችል የማስፈጸሚያ መመሪያ ሥልጠና በይፋ ተጀመረ።
የሥልጠና መድረኩን በይፋ የከፈቱት የሥራና ክህሎት ሚኒስቴር፣ የሥራ፣ሥራ ሥምሪትና ገበያ ዘርፍ ሚኒስትር ዴኤታ ክቡር አቶ ሰለሞን ሶካ ኢትዮጵያ በአሁኑ ወቅት የምታከናውናቸው ታሪካዊና መዋቅራዊ የኢኮኖሚና ማኅበራዊ ሪፎርሞች ዋና ማዕከል ሁለንተናዊ ብልፅግናን ማረጋገጥ” መሆኑን ጠቀሰው የወጣቶችን የሥራ አጥነት ችግር በዘላቂነት ለመቅረፍ በተከናወኑ ተግባራት በሚሊዮን የሚቆጠሩ ወጣቶች ወደ አምራች ኃይልነት እየተቀየሩ ይገኛሉ ብለዋል፡፡
መንግስት በመደበኝነት ከሚያከናውናቸው የሥራ ዕድል ፈጠራ ሥራዎች ጎን ለጎን ከዓለም አቀፍ አጋር አካላት ጋር በመተባበር እየተገበራቸው የሚገኙ ፕሮጀክቶችም ለወጣቶች ሰፊ የሥራ መፍጠሪያ አማራጭ በመሆን እያገለገሉ እንደሚገኙም ጠቁመዋል።
በዚሁ መሰረት የሥራና ክህሎት ሚኒስቴር ከዓለም ባንክ ጋር በሚተገብረው ‹‹የወጣቶች የሥራ ላይ ልምምድ›› ፕሮግራም በሦስቱ ዙር 54,913 ወጣቶች የሥራ ላይ ልምምድ እንዲያደርጉ እንዲሁም 52,786 ወጣቶች ቋሚ የሥራ ዕድል ተጠቃሚ እንዲሆኑ ማስቻሉን አስታውቀዋል፡፡
የተገኘው ውጤት የመንግሥት የሥራ ዕድል ፈጠራ ፖሊሲ በተግባር በዜጎች ሕይወት ላይ የሚታይና የሚዳሰስ ለውጥ እያመጣ መሆኑን የሚያሳይ ታሪካዊ ምዕራፍ መሆኑንም አስረድተዋል፡፡
በመድረኩ ላይ የእንኳን ደህና መጣችሁ መልዕክት ያስተላለፉት የሀዋሳ ከተማ ከንቲባ ክቡር አቶ ጥራቱ በየነ የሥራ ዕድል ፈጠራ ለከተሞች ቁልፍ አጀንዳ መሆኑን ጠቅሰው ‹‹የወጣቶች የሥራ ላይ ልምምድ ፕሮግራም›› መተግበር ከጀመረ በኋላ ወደ ከተሞች የሚደረግ ፍልሰትን ጨምሮ በተለያ ምክንያቶች ለሥራ አጥነት ችግር የተጋለጡ ወጣቶችን ህይወት በእጅጉ መቀየር እንደተቻለ ተናግረዋል፡፡
የሲዳማ ክልል የሥራና ክህሎት ቢሮ ምክትል ኃላፊ አቶ ከፍያለው ከበደ በበኩላቸው በክልሉ በፕሮግራሙ ከስምንት መቶ በላይ ወጣቶችን በፕሮግራሙ ተጠቃሚ ማድረግ መቻሉን ተናግረዋል፡፡
ተሳታፊዎች ስልጠናቸውን እንዳጠናቀቁ ብቁ የሆኑ አለማማጅ ድርጅቶችን መለየት እና መመልመል፣ የሥልጠናና የሙያ መስኮችን በጥናት መወሰን፣ተጠቃሚ ወጣቶችን በግልጽነትና በአድልዎ አልባነት መመዝገብ፣ የቴክኒክና ሙያ (TVET) ተቋማትንና የግሉን ዘርፍ በተቀናጀ መልኩ ማስተሳሰርና የከተማ አመራርን በሙሉ የሚያሳትፍ የኦሪየንቴሽን መድረክ በአጭር ጊዜ ማዘጋጀት እንደሚጠበቅባቸውም ክቡር አቶ ሰለሞን ሶካ በመልዕክታቸው ማጠቃለያ ላይ በአፅንኦት አሳስበዋል፡፡

ሴቶች መብታቸውን አስከብረው ኃላፊነታቸውን በብቃት እንዲወጡ የማስተባበርና የመከታተል ከፍተኛ ኃላፊነት የተጣለበት አደረጃጀት
የሥራና ክህሎት ሚኒስቴር ሴት ሠራተኞች ፎረም አባላት በፎረሙ መተዳደሪያ ደንብ እና በ2019 በጀት ዓመት ዕቅድ ላይ ተወያዩ፡፡
በዋናነት ሴቶች እርስ በእርስ እንዲደጋገፉ፣ አቅማቸውን እንዲገነቡ እና በሥርዓተ ፆታ እኩልነት ዙሪያ የሚሰሩ ሥራዎችን ይበልጥ ውጤታማ እንዲሆኑ የሚኒስቴር መ/ቤቱን መቋቋም ተከትሎ ፎረሙ የተመሰረተ መሆኑ ተገልጿል፡፡
የሴቶችና ማህበራዊ ጉዳይ አካቶ ትግበራ ሥራ አስፈጻሚ የሆኑት ወ/ሮ እምዬ ቢተው ባስተላለፉት መልዕክት፤ ይህ ፎረም የሴቶችን እኩል ተሳታፊነትና ተጠቃሚነት ለማረጋገጥ የሚሠራ መሆኑን ገልፀው በሥራ ቦታ ላይ የሴቶች መብትና ክብር በአግባቡ ተጠብቆ መሰራቱን በቅርበት የሚከታተል ቁልፍ አደረጃጀት ነው ብለዋል፡፡
ሴቶች መብታቸውን አስከብረው ኃላፊነታቸውን በብቃት እንዲወጡ የማስተባበርና የመከታተል ከፍተኛ ኃላፊነት የተጣለበት መሆኑን ገልጸዋል፡፡
በተጨማሪም በሚኒስቴር መስሪያ ቤቱ ስር በሚገኙ ሦስቱም ዘርፎች ማለትም በሥራ ዕድል ፈጠራ፣ በክህሎት ልማትና በሰላማዊ ኢንዱስትሪ ግንኙነት ውስጥ የሴቶችን ተጠቃሚነት ለማረጋገጥ የፎረሙ መመሥረት ወሳኝ መሆኑ ተጠቁሟል፡፡
የሴቶችን አቅም ማሳደግ፣ የሚደርሱ ጥቃቶችንና በደሎችን በጋራ መከላከል እንዲሁም ልምድና ተሞክሮዎችን መለዋወጥ የፎረሙ ዝርዝር ዓላማዎች ሆነው ተቀምጠዋል፡፡
አደረጃጀቱን ይበልጥ የማጠናከር ሥራ ከሁሉም አባላት እንደሚጠበቅ መልዕክት የተላለፈ ሲሆን ተሳታፊዎቹ በቀረቡት የመተዳደሪያ ደንብና የቀጣይ በጀት ዓመት ዕቅድ ላይ በጥልቀት መክረውና በሙሉ ድምጽ አፅድቀው ውይይቱን አጠናቀዋል፡፡

‹‹መንግሥት ለጀመረው የሀገር በቀል ኢኮኖሚያዊ ማሻሻያ ኢንተርፕራይዞች የኢኮኖሚው የጀርባ አጥንትና ዋና ሞተሮች ናቸው ››
ክቡር አቶ ሰለሞን ሶካ
የሥራና ክህሎት ሚኒስቴር ፣ የሥራ፣ ሥራ ሥምሪትና ገበያ ዘርፍ፣ ሚኒስትር ዴኤታ
የሥራና ክህሎት ሚኒስቴር ለዘርፉ አስፈፃሚና ባለድርሻ አካላት በጥቃቅን፣ አነስተኛና መካከለኛ ኢንተርፕራይዞች ፖሊሲ ላይ የግንዛቤ ማስጨበጫ ስልጠና ሰጠ፡፡
የስልጠና መድረኩን በንግግር የከፈቱት የሥራ፣ ሥራ ስምሪትና ገበያ ዘርፍ ሚኒስትር ዴኤታ ክቡር አቶ ሰሎሞን ሶካ፤ መንግሥት ለጀመረው የሀገር በቀል ኢኮኖሚያዊ ማሻሻያ ኢንተርፕራይዞች የኢኮኖሚው የጀርባ አጥንትና ዋና ሞተሮች መሆናቸውን ገልፀዋል፡፡
ኢንተርፕራይዞች ይህን ወሳኝ ሚናቸውን በአግባቡ እንዲወጡ የተቀረፀው የጥቃቅን፣ አነስተኛና መካከለኛ ኢንተርፕራይዞች ልማት ፖሊሲ የኢኮኖሚ ስብራቶችን ለመቅረፍ ፣ ዕድገትን ለማስቀጠልና ብልፅግናን ለማረጋገጥ በሚደረገው ጥረት ውስጥ ቁልፍ ድርሻ እንደሚኖረው ጠቁመዋል፡፡
ባለፉት ሁለት አስርት ዓመታት በዘርፉ የነበሩ ድጋፎች የተበጣጠሱና አካታች ባለመሆናቸው ኢንተርፕራይዞች በአንድ ደረጃ ላይ ተንጠልጥለው እንዲቀሩ ማድረጋቸውን አስታውሰው፣ አዲሱ ፖሊሲ እነዚህን ማነቆዎች በዘላቂነት ለመፍታት የተዘጋጀ ሰነድ መሆኑን ገልጸዋል።
ኢንተርፕራይዞች በሀገራችን የማክሮ ኢኮኖሚ እድገት ላይ ዋንኛ ተዋናይ ወደሚሆኑበት ደረጃ እንዲሻገሩ የተፈጠረውን ምቹ የፖሊሲ አውድ በመጠቀም ለተግባራዊነቱ እያንዳንዱ የዘርፉ አስፈፃሚና ባለድርሻ አካላት ተገቢውን ርብርብ እንዲያደርጉ ክቡር አቶ ሰለሞን መልዕክታቸውን አስተላልፈዋል፡፡
የአፍሪካ ልማት ባንክ የፋይናንስ ድጋፍ የሚተገበረው ‹‹ በግብርና ኢንተርፕራይዞች ለሥራ ዕድል ፈጠራ ፕሮጀክት የፖሊሲውን ሰነድ በማሳተም፣ በማሰራጨትና የግንዛቤ መስጨበጫ መድረኩን በማዘጋጀት ላበረከተው የላቀ አስተዋጽዖም ምስጋናቸውን አቅርበዋል፡፡

በጋራ እንፈጥራለን
የሥራና ክህሎት ሚንስቴር ተጠሪ ተቋም የሆነው የኢፌዴሪ ቴክኒክና ሙያ ስልጠና ኢንስቲትዩት የሚያዘጋጀው የቴክኖሎጂ ባህል ግንባታ ፓነል ውይይት ለአምስተኛ ዙር «በጋራ እንፈጥራለን» በሚል መሪ ቃል ተካሂዷል።
የኢንስቲትዩቱ የቴክኖሎጂና ኢንተርፕራይዝ ልማት ምክትል ዋና ዳይሬክተር ወ/ሮ ጸዳለ ተክሉ እንደገለጹት፤ ይህ የፓናል ውይይት በቡድን ስራ ውጤታማነት ላይ ያተኮረ ምክረ-ሀሳብ ለመለዋወጥ ትልቅ ዕድል ፈጥሯል።
ስለ ኢኖቬሽንና ፈጠራ ሲነሳ የቡድን ስራ ወሳኝ ተግባር መሆኑን የገለጹት ምክትል ዋና ዳይሬክተሯ ኢንስቲትዩቱ ለፈጠራ ባለሙያዎች አርአያ እንዲሆን የተለያዩ ዘርፎች እርስበርስ መተሳሰር እንዳለባቸውና በዘርፉ ያሉ በርካታ ሀገራዊ ተልዕኮዎችን ለማሳካት የቡድን ስራ የግድ እንደሚያስፈልግ አስገንዝበዋል።
በተጨማሪም በጋራ መስራት እውቀትን፣ ክህሎትን እና ችሎታን በማቀናጀት የማህበረሰቡን ችግሮች ለመፍታት የሚያስችሉ አዳዲስ ግኝቶችን ለመፍጠር እንደሚያስችል አብራርተዋል።
በመጀመሪያው ዓለም አቀፍ የቴክኖሎጂ ውድድር ላይ የብር ሜዳሊያ ተሸላሚ የሆኑት ወጣት የፈጠራ ባለሙያዎች የዕለቱ የፓናል ውይይት ዋና ተሳታፊዎች የነበሩ ሲሆን በጋራ መስራታቸው ለፈጠራ ስራቸው ያበረከተውን ከፍተኛ አስተዋጽኦ ለታዳሚ ወጣቶች ልምዳቸውን አካፍለዋል።
ወጣቶቹ ሀመረ፣ ሩት፣ ያብስራ እና ሪሃና “የተንቀሳቃሽ የአእምሮ ግፊት መከላከያ መሳሪያ” ላይ ያመጡትን አዲስ የፈጠራ ስራ በሂደቱ የገጠሟቸውን ተግዳሮቶች እና በጋራ ያሳለፉትን ጠንካራ ተሞክሮ አቅርበዋል።
እነዚህ ወጣት የፈጠራ ባለሙያዎች ወደፊትም ፕሮጀክታቸውን ይበልጥ በማሳደግ ወደ ምርት ለማሸጋገር እና ለሀገራችን የጤና ዘርፍ ትልቅ መፍትሄ ለማምጣት በርትተው እንደሚሰሩ በቁርጠኝነት ገልጸዋል።
በሌላ በኩል በኢንስቲትዩቱ የሊደርሽፕና ማኔጅመንት ፋኩልቲ አማካኝነት በቡድን ስራ ውጤታማነት፣ ተግዳሮቶች እና ሊከተሏቸው በሚገቡ ስልታዊ አካሄዶች ላይ ያተኮረ መወያያ ጽሁፍ አቅርበዋል።
በቡድን መስራት በዘላቂነት ትርፋማ እንደሚያደርግ የተገለጸ ሲሆን ከታዳሚዎች ለተነሱ የተለያዩ ጥያቄዎችም ሰፊ ማብራሪያ ተሰጥቷል።
በአጠቃላይ በኢንስቲትዩቱ የቴክኖሎጂና ፈጠራ ባህልን ለማስረጽ የተጀመረው ይህ የፓነል ውይይት መድረክ በየጊዜው ሰፊና በጎ ለውጥ ማምጣት የሚችሉ አዳዲስ ሀሳቦች እየተገኙበት መሆኑ ተመላክቷል።
መረጃው የኢፌዴሪ ቴክኒክና ሙያ ስልጠና ኢኒስቲትዩት ነው፡፡

ክህሎት መር የሥራ ዕድል ፈጠራን በማጠናከር የዜጎችን ተጠቃሚነት የሚያሳድጉ ውጤታማ ተግባራት እየተከናወኑ ነው
ክህሎት መር የሥራ ዕድል ፈጠራን በማጠናከር የዜጎችን ተጠቃሚነት የሚያሳድጉ ውጤታማ ተግባራት እየተከናወኑ መሆኑን የሥራና ክህሎት ሚኒስትር ዴኤታ ሰለሞን ሶካ ገለጹ፡፡
የሥራና ክህሎት ሚኒስትር ዴኤታ ሰለሞን ሶካ ለኢዜአ እንደገለጹት፤ በለውጡ መንግሥት የተተገበሩ የሪፎርም ሥራዎች የወጣቶችን ኢኮኖሚና ማኅበራዊ ተጠቃሚነት የሚያጎለብቱ ተጨባጭ ውጤቶችን አስገኝተዋል።
ባለፉት 4 ዓመታት በተከናወኑ ዘርፈ-ብዙ የሪፎርም ሥራዎች ለ19 ነጥብ 5 ሚሊዮን ዜጎች የሥራ ዕድል መፈጠራቸውን ጠቁመው፣ ከዚህም መካከል 75 በመቶ በላይ የሚሆኑት ወጣቶች መሆናቸውን ተናግረዋል።
ለውጡ ካስገኛቸው ዋና ዋና ስኬቶች መካከል ወጣቶች ከተለመደው የቅጥር ሐሳብ ወጥተው ወደ ሥራ ፈጣሪነት እንዲሸጋገሩና ለሌሎች የሥራ ዕድል እንዲፈጥሩ ምቹ ሁኔታዎችን መፈጠራቸውን ለአብነት ጠቅሰዋል፡፡
በተጨማሪም የቤተሰብ የንግድ ሥራዎች እንዲስፋፉ በማድረግ ረገድ አበረታች ውጤቶች መገኘታቸውን አክለዋል፡፡
የዲጂታል ቴክኖሎጂዎች መስፋፋትና ለዘርፉ የተሰጠው ልዩ ትኩረት ለወጣቶች ዘመናዊ፣ ፈጣንና ምቹ የሥራ ዕድሎችን የፈጠረ ሲሆን፣ ይህም በዓለም አቀፍና በአህጉራዊ የዲጂታል የሥራ ገበያ ላይ የሀገሪቱንና የወጣቶቹን ተወዳዳሪነት ማሳደጉን አብራርተዋል።
የሴቶችና ማኅበራዊ ጉዳይ ሚኒስትር ዴኤታ ሙና አሕመድ በበኩላቸው፤ ከለውጡ በኋላ የወጣቶችን አቅም በማሳደግ ረገድ ሰፊ ስራዎች መሰራታቸውን ጠቅሰዋል፡፡
በዚህም ተስፋ ሰጪ፣ ዘላቂና ክህሎት መር የሥራ ዕድሎችን በተሻለ ሁኔታ ለመፍጠር ትልቅ አቅም መገንባቱን አብራርተዋል።
በመዲናዋ የሥራ ዕድል ተጠቃሚ ከሆኑት መካከል ወጣት ጋሻው ዓለሙ የመኪና ጎማና ባትሪዎችን መልሶ ጥቅም ላይ የማዋል ሥራ ላይ መሰማራቱን ጠቅሷል፡፡
የምናመርታቸው ምርቶች የአካባቢ ብክለትን ከመቀነስና ቆሻሻን ወደ ሀብት ከመቀየር ባለፈ፣ የውጭ ምንዛሬ ግኝትን የሚያሳድጉና ሰፊ የሥራ ዕድል የሚፈጥሩ ናቸው ብሏል።
በማኅበር በመደራጀት ከውጭ የሚገቡ ምርቶችን የሚተኩ የቤትና የቢሮ መገልገያ ቁሳቁሶችን እያመረቱ መሆናቸውን የተናገረው ደግሞ ወጣት አስቻለው ጌትዬ ነው፡፡
በቀጣይም የምርቶቻቸውን የገበያ ተደራሽነትና የሥራ ዕድሎችን ይበልጥ ለማስፋፋት እየሠሩ መሆናቸውን ተናግሯል። መረጃው የኢዜአ ነው።

በ270 ቀበሌዎች 32000 ወጣት ሴቶችን ተጠቃሚ ለማድረግ የሚያስችል የጋራ ስምምነት
የሥራና ክህሎት ሚኒስቴር በክህሎት ልማትና በሥራ ዕድል ፈጠራ ረገድ የዜጎችን ተጠቃሚነት ለማሳደግ የሚያስችል ስምምነት ‹ ፖፑሌሽን ሰርቪስ ኢንተርናሽናል› (PSI/E) ከተሰኘ ዓለም አቀፍ መንግስታዊ ያልሆነ ተቋማ ጋር ተፈራረመ፡፡
የሥራና ክህሎት ሚኒስቴር የቴክኒክና ሙያ ዘርፍ ሚኒስትር ዴኤታ ክቡር ተሻለ በሬቻ( ዶ/ር ) በፊርማ ሥነ-ሥርዓቱ ላይ ባስተላለፉት መልዕክት፤ የዜጎችን ኢኮኖሚያዊ ተጠቃሚነት ለማረጋገጥ ሚኒስቴር መሥሪያ ቤቱ የሚያስፈፅማቸው ተልዕኮዎች የባለድርሻ አካላትን ርብርብ በከፍተኛ ሁኔታ የሚፈልጉ መሆናቸውን ገልፀዋል፡፡
በዚሁ መሠረት‹‹ ሚኒስቴር መሥሪያ ቤቱ ከበርካታ ተቋማት ጋር የመግባባያ ሰነድ በመፈራረም ዘርፈ ብዙ ተግባራትን በአጋርነት እያከናወነ ይገኛል›› ብለዋል፡፡
ከማስተርካርድ ፋውንዴሽን በተገኘ የገንዘብ ድጋፍ “ደረጃውን ወደጠበቀና ወደ ምሉዕ የሥራ እድል ማደግ” (Step Up to Dignified and Fulfilling Work) በሚል ስያሜ ለሦስት ዓመታት የሚተገበረው ይህ ፕሮግራም በአጠቃላይ 32 ሺህ ወጣት ሴቶችን ተደራሽ ያደርጋል ተብሎ ይጠበቃል፡፡
በዚህ ፕሮግራም ስር 32 ሺህ ለሚሆኑት ወጣት ሴቶች የፋይናንስ አቅማቸውን የማጠናከር ሥራ የሚሠራላቸው ሲሆን፣ ከእነዚህ ውስጥ 24 ሺህ ለሚሆኑት ወጣት ሴቶች ደግሞ የራሳቸውን ሥራ እንዲፈጥሩ ይሰራል፣ በተጨማሪም ከ4 ሺህ በላይ አዳዲስ ኢንተርፕራይዞች እንደሚፈጠሩ በዕቅዱ ተካቷል፡፡
ይህ ግዙፍ ፕሮጀክት በፌዴራል የሥራና ክህሎት ሚኒስቴር እና በፖፑሌሽን ሰርቪሰስ ኢንተርናሽናል (PSI) መካከል በጋራ ዲዛይን በማድረግ (co-creation) የተጀመረ ሲሆን፤ ዋና ዓላማውም ዕድሜያቸው ከ15-35 ለሆኑ ወጣት ሴቶች የፋይናንስ አገልግሎትን ተደራሽ በማድረግ፣ የትምህርት፣ የክህሎት እንዲሁም የሥራ ዕድሎችን በማስፋት የድህነት ቅነሳን ማፋጠን ነው፡፡
ፕሮጀክቱ በተለይም የመሰረተ ልማት ችግር ባለባቸው አካባቢዎች ላይ ትኩረት በማድረግ ወጣቶችን የአካታች እድገትን ተጠቃሚ እንዲሆኑ ፣ የማህበረሰብን ችግሮች ለመፍታት የራሳቸውን አስተዋጽኦ እንዲያበረክቱ ለማስቻል ታስቦ የተዘጋጀ ነው፡፡
በሁለቱ ወገኖች መካከል ያለው ይህ የረጅም ጊዜ አጋርነት የፕሮጀክቱ ዘመን ከመጠናቀቁ በፊት ለታለሙ የህብረተሰብ ክፍሎች ዘላቂና አስተማማኝ የሥራ ዕድልን የማስገኘት ስትራቴጂካዊ ግብን እንደሚያሳካ ታምኖበታል፡፡

የመጀመሪያ ዓለም አቀፍ ፕላትፎርም ኢኮኖሚ የሥራ ደረጃ ፀደቀ
የዓለም አቀፉ የሥራ ድርጅት (ILO) 114ኛው ዓለም አቀፍ ጉባኤ በጄኔቫ ሲጠናቀቅ፣ በዲጂታል ዘመን የሥራ ገበያን የሚመራ የመጀመሪያውን ዓለም አቀፍ የፕላትፎርም ኢኮኖሚ የሥራ ደረጃ (Convention) በሰፊ ድምፅ በማፅደቅ ታሪካዊ ውሳኔ አሳልፏል፡፡
ይህ አዲስ ኮንቬንሽን በዲጂታል ፕላትፎርሞች ላይ የሚመሠረት ሥራ (platform work) ላይ የሚሰሩ ሰራተኞች የሥራ መብት፣ የሥራ ደህንነት፣ የፍትሃዊ ክፍያ እና የማህበራዊ ጥበቃ መርሆዎችን ለማጠናከር ዓለም አቀፍ መሠረት ይጣል ተብሎ ይጠበቃል፡፡
በዚህ ጉባኤ ላይ በሥራና ክህሎት ሚኒስቴር የአሠሪና ሠራተኛ ዘርፍ ሚኒስትር ዴኤታ ክቡር አቶ ዳንኤል ተሬሳ የሚመራ የኢትዮጵያ ልዑካን ቡድን ንቁ ተሳትፎ አድርጓል፡፡
ልዑካኑ በአሠሪዎችና በሠራተኞች ኮንፌዴሬሽኖች ጋር በጋራ በመሆን በተለያዩ ኮሚቴዎች ውይይቶች ተሳትፎ አድርገዋል፡፡
በውይይቶቹ የተነሱት ዋና ጉዳዮች መካከል የዲጂታል እና ፕላትፎርም ኢኮኖሚ ሽግግር፣ የሴቶች እኩል ተሳትፎ እና ጥቅም ማረጋገጥ፣ እንዲሁም ሰላማዊ የኢንዱስትሪ ግንኙነትን በማጠናከር ምርታማነትን ማሳደግ ይገኙበታል፡፡
አዲሱ የተፀደቀው ዓለም አቀፍ የሥራ ደረጃ በተለይ በፈጣን የዲጂታል ዘመን ላይ የሚሰሩ ሠራተኞች በግልፅ የሥራ መብት እና የጥበቃ ስርዓት እንዲያገኙ የሚያስችል የመጀመሪያው ዓለም አቀፍ ማዕቀፍ መሆኑ ተጠቅሷል፡፡
በሌላ በኩል በዲጂታል እና በአረንጓዴ የልማት ሽግግሮች ወቅት ሴቶች እኩል የዕድሉ ተጠቃሚ እንዲሆኑ የሚያስችሉ ሥርዓታዊ ማሻሻያዎችን ማድረግ ላይ ትኩረት ተሰጥቷል፡፡
ሰላማዊ የኢንዱስትሪ ግንኙነትን ለማረጋገጥ እንዲሁም ምርትና ምርታማነትን ለማሳደግ ማነቆ የሆኑ ችግሮችን ለመቅረፍ በመንግስታት፣ በአሠሪዎች እና በሠራተኞች መካከል ያለውን ትብብር ይበልጥ ለማጠናከር የሚያስችሉ ስታንዳርዶችን ማሻሻል ሌላው የተወያዩበት ዋና ነጥብ ነበር፡፡