News

ከ2019 የትምህርት ዘመን ጀምሮ ተግባራዊ የሚደረጉ ተግባር ተኮር የሙያ ዘርፎች
በዓለም አቀፍ ደረጃ ተወዳዳሪ የሆኑ ብቁ ዜጎችን ለማፍራት በሥራና ክህሎት ሚኒስቴር በተሻሻለው የኢትዮጵያ የቴክኒክና ሙያ ስትራቴጂ ከተቀመጡ ቁልፍ ስትራቴጂዎች መካከል ከታችኛው የትምህርት እርከን ጀምሮ ዜጎች የቴክኒክና ሙያ ስልጠናን እንዲያገኙ ማስቻል(vocationalization አንዱ ነው፡፡
በዚሁ መሰረት ከ2019 የትምህርት ዘመን ጀምሮ፣ በመደበኛ ሥርዓተ ትምህርት ውስጥ ተግባራዊ የሚደረጉት 11 የሙያ ዘርፎችን የተመለከተ የምክክር መድረክ የአዲስ አበባ ትምህርት ቢሮ ፣ የሥራና ክህሎት ቢሮ አመራሮች እና የቴክኒክና ሙያ ኮሌጅ ዲኖች በተገኙበት ተካሂዷል፤
በውይይቱ ላይ የአዲስ አበባ መስተዳድር የትምህርት ቢሮ ኃላፊ ዶ/ር ዘላለም ሙላቱ አዲሱ አሰራር ተማሪዎችን በክህሎት በመቅረጽ አምራች ዜጋ ለማፍራት ያለመ መሆኑን ገልጸዋል፡፡
የሥራና ክህሎት ቢሮ የዘርፍ ኃላፊ ወ/ሮ ዳግማዊት ግርማ በበኩላቸው ገበያው የሚፈልገው በክህሎት የበቃ የሰው ኃይል ለማቅረብ የተቀናጀ ሥራ አስፈላጊ መሆኑን ጠቁመዋል።
ለሙያ ዘርፎቹን ለመተግበር የሚያስችል የመርሃ ትምህርት፣ የተማሪ ሞጁል እና የመምህር መመሪያ ዝግጅት በትምህርት ሚኒስቴር ማጠናቀቁ ተገልጿል፡፡
በዚሁ መሠረት ከ2019 የትምህርት ዘመን ጀምሮ ብረታ ብረት ፣ቴክኖሎጂ፣ አውቶሞቲቭ ቴክኖሎጂ፣ አልባሳት ቴክኖሎጂ፣ ህንፃ ኤሌክትሪክ መስመር ዝርጋታ፣ ቧንቧ ሥራ፣ ሶፍትዌር ማበልጸግ፣ ሰብል አመራረት፣ ጤና ክብካቤ አገልግሎት፣ ሆቴል አገልግሎት፣ ፀጉር ሥራና ውበት አገልግሎት እና ምግብ ዝግጅት የመደበኛ የትምህርት መርሃግብር አካል ሆነው እንደሚሰጡ ተነግሯል።
መረጃው የአዲስ አበባ ሥራና ክህሎት ቢሮ ነው

“ሥራ ፈጣሪዎች እንጂ ሥራ ፈላጊዎች እንደማትሆኑ ሙሉ እምነት አለኝ”
ክብርት ወ/ሮ ሙፈሪሃት ካሚል
የሥራና ክህሎት ሚኒስትር
የኢፌዴሪ ቴክኒክና ሙያ ስልጠና ኢንስቲትዩት በደረጃ 6 እና 7 በተለያዩ መርሃ ግብሮች ያሰለጠናቸውን 1,875 ስልጠና አጠናቃቂዎች በደማቅ ሥነ-ሥርዓት አስመርቋል።
የሥራና ክህሎት ሚኒስትር ክብርት ወ/ሮ ሙፈሪሃት ካሚል፣ ትምህርትና ስልጠና የሰውን አቅም ለማዳበርና ለተሻለ የወደፊት ሕይወት ለመዘጋጀት የሚያግዙ መሠረቶች መሆናቸውን ገልጸዋል።
“ትምህርትና ስልጠና በየደረስንበት ምዕራፍ ሙሉ ሰው እንድንሆን፣ መጪው ጊዜያችን ብሩህ እንዲሆን የሚያዘጋጁን የስንቅ ማዕዶቻችን ናቸው” ብለዋል።
ክብርት ሚኒስትር ተመራቂዎቹ ዛሬ ለዚህ ደረጃ የደረሱት በቀላሉ እንዳልሆነ ጠቁመው፣ ብዙ ሌሊቶችን በማጥናት፣ ብዙ ሰዓታትን በመሥራት፣ በጽናትና በትዕግስት እንዲሁም ከቤተሰብና ከልጆች ናፍቆት ጋር በመታገል ያለፉት ሂደቶች የጽናት፣ የብርታትና የዲሲፕሊን ማሳያ መሆናቸውን ገልጸዋል።
“ዛሬ ነጋችሁን ምን ያህል ብሩህ እንደሆነ አጉልቶ የሚያሳይ ዕለት ነው” ሲሉም ተመራቂዎቹን አበረታተዋል።
ስልጠናም ሆነ ትምህርት የሀገርን እምቅ አቅም ለማውጣት፣ የሀገርን ችግር ለመፍታት እንዲውሉ ማድረግ ከተቻለ ኢትዮጵያ የጀመረችውን ሁለንተናዊ ብልጽግና የማረጋገጥ ጉዞ ውስጥ ዘርፉ የማይተካ ሚናውን መወጣት xንደሚችልም አብራርተዋል፡፡
በዚህ የለውጥ ጉዞ የቴክኒክና ሙያ ዘርፉ ለሀገር ውስጥና ለዓለም አቀፍ የሥራ ገበያ ብቁና ተወዳዳሪ የሰው ኃይል ከማፍራት ባሻገር፣ ችግር ፈቺ ቴክኖሎጂዎችን በማፍለቅና በመፍጠር የሀገር ልማትን እንዲያግዝ እየተሰራ መሆኑን አስረድተዋል።
የዘርፉን አቅም ለማሳደግም እንደ ክህሎት ፓርክ (Skill Park) ያሉ ዘመናዊ መሠረተ ልማቶች እየተገነቡ መሆናቸውን ጠቁመው፣ እነዚህ ልማቶች ዘርፉን ወደ ላቀ ምዕራፍ እንደሚያሸጋግሩም ገልጸዋል።
“ሥራ ፈጣሪዎች እንጂ ሥራ ፈላጊዎች እንደማትሆኑም ሙሉ እምነት አለኝ” ሲሉም ለተመራቂዎቹ ያላቸውን እምነት ገልጸዋል።
ክብርት ሚኒስትር ለተመራቂዎች ስኬት የወላጆች፣ የቤተሰብ፣ የመምህራንና የኢንስቲትዩቱ አመራሮች አስተዋጽኦ የላቀ መሆኑን ጠቁመው ምስጋና አቅርበዋል።
በምረቃ ሥነ-ሥርዓቱ ላለፉት በርካታ ዓመታት በቴክኒክና ሙያ ዘርፍ ከፍተኛ አስተዋጽኦ ላበረከቱት የሰላም ቴክኒክና ሙያ መሥራች ወ/ሮ ፀሐይ ሮሺሊ ልዩ የእውቅና ሽልማት ተበርክቷል።

የኢንዱስትሪውን ፍላጎት ለማሟላት የግብርና ኮሌጅ አመራሮች የፕሮጀክት አስተዳደር አቅም መጠናከር
‎
የሥራና ክህሎት ሚኒስቴር ከSNV ኢትዮጵያ የሆርቲ-ላይፍ (Horti-LIFE Green Growth) ፕሮጀክት ጋር በመተባበር በሆርቲካልቸር ልማትና በክህሎት ማሳደግ ላይ ያተኮረ የስድስት ወር አፈፃፀም ግምገማ፣ ውይይትና የሥልጠና መርሃ-ግብር በአዲስ አበባ አካሄደ።
‎በመድረኩ ላይ ከሰባት ክልሎች የተወጣጡ የ60 የግብርና ቴክኒክና ሙያ (A-TVET) ኮሌጆች ዲኖች፣ ምክትል ዲኖች፣ የመንግሥት አካላትና አጋሮች ተሳትፈዋል።
‎
የመርሃ-ግብሩ ዋና ዓላማ የ15ቱን ኮሌጆች የሥራ አፈጻጸም፣ ምርጥ ተሞክሮዎች፣ የተማሪዎች የልምምድ ማሳ እና የአርሶ አደሮች የመስክ ስልጠና እንቅስቃሴዎችን በጋራ መገምገም እንደሆነ ተገልጿል፡፡
‎በተጨማሪም የአመራሩን የፕሮጀክት አስተዳደር አቅም በማጠናከር ተወዳዳሪና የኢንዱስትሪውን ፍላጎት የሚያሟላ የሰው ኃይል ለማፍራት መድረኩ ከፍተኛ ሚና እንደሚኖረው ተጠቁሟል፡፡
‎
‎በሁለት ምዕራፍ በተካሄደው በዚህ ፕሮግራም በመጀመሪያው ቀን፤ በኮሌጆች የተከናወኑ የሥራ አፈጻጸሞችና የመልካም ተሞክሮ ልውውጦች የተካሄዱ ሲሆን፣ በቀጣዮቹ ሶስት ቀናት ደግሞ በአለም አቀፍ ደረጃ እውቅና ባላቸው ባለሙያዎች አማካኝነት ለኮሌጅ አመራሮች የፕሮጀክት ቀረጻ፣ የሀብት፣ የጊዜና የአደጋ አስተዳደር እንዲሁም የክትትልና ግምገማ ስልጠና ተሰጥቷቸዋል።
‎በመጨረሻም የኮሌጆቹን የ2018/19 ዓ.ም የጋራ የሥራ እቅድ በማጽደቅና ለሰልጣኝ አመራሮች የስልጠና ማጠናቀቂያ ሰርተፊኬት በመስጠት መርሃ-ግብሩ ተጠናቋል።

የጠቅላይ ሚኒስትሩ ጥሪ፣ የወጣቶች ሚና እና የኢትዮጵያ መጻኢ ዕድገት
ጠቅላይ ሚኒስትር ዐቢይ አሕመድ (ዶ/ር) ለኢትዮጵያ ወጣቶች ያስተላለፉት የክረምት ወቅት የሥልጠና ጥሪ ሀገራችን ወደ ዕውቀት-መር የዲጂታል ዘመን እያደረገች ያለውን ጉዞ በግልጽ የሚያሳይ ነው።
የ5 ሚሊዮን ኢትዮጵያውያን ኮደሮች ኢኒሼቲቭን መሠረት ያደረገው ይህ መልዕክት ወጣቶች የዕረፍት ጊዜያቸውን በዓለም አቀፍ ደረጃ ተፎካካሪ ወደሚያደርጋቸው የቴክኖሎጂ ክህሎት እንዲቀይሩት የሚያስችል ግዙፍ ሀገራዊ ራዕይ ሰንቋል።
በ’ዩዳሲቲ’ በኩል በነጻ የሚሰጡት እና ዓለም አቀፍ ዕውቅና ያላቸው የመሠረታዊ ኮዲንግ፣ የዳታ ሳይንስ፣ የመተግበሪያ (አፕሊኬሽን) ልማት እና የሰው ሠራሽ አስተውሎት (AI) ሥልጠናዎች ወጣቶች የነገዋን ኢትዮጵያ በቴክኖሎጂ የመገንባት አቅማቸውን እንዲያጎለብቱ የተመቻቹ ወሳኝ ዕድሎች ናቸው።
በአሁኑ ወቅት ዓለም አቀፉ ማኅበረሰብ በአራተኛው የኢንዱስትሪ አብዮት እና በፈጣን የሰው ሠራሽ አስተውሎት ዕድገት ውስጥ በሚገኝበት ነባራዊ ሁኔታ፣ የዲጂታል ክህሎት ባለቤት መሆን የሕልውና እና የብቃት ማረጋገጫ ሆኗል።
ኢትዮጵያም ይህንን ዓለም አቀፍ ተፎካካሪነት በመገንዘብ ‘ዲጂታል ኢትዮጵያ 2025’ን በስኬት በማጠናቀቅ፣ ‘ዲጂታል ኢትዮጵያ 2030’ ስትራቴጂን ወደ መተግበር ተሸጋግራለች።
የቴሌኮም ዘርፉን ክፍት በማድረግ የኢንተርኔት ተደራሽነትን ማሳደጓ፣ የፋይዳ ዲጂታል መታወቂያን ከ48 ሚሊዮን በላይ ዜጎች ዘንድ ማድረሷ፣ እንዲሁም የዲጂታል ክፍያ ሥርዓቶችን በማስፋፋት የነዳጅ ግብይትን ጨምሮ በቢሊዮኖች የሚቆጠር ገንዘብ በዲጂታል መንገድ እንዲዘዋወር ማድረጓ ለዚህ የክህሎት ግንባታ ዋና አስቻይ መሠረተ ልማት ነው።
የጠቅላይ ሚኒስትሩ ጥሪም እነዚህን የተዘረጉ መሠረተ ልማቶች ወደ ተጨባጭ የኢኮኖሚ እሴት ሊለውጥ የሚችል ብቁ የሰው ኃይል የሚያፈራ በመሆኑ ከሀገራዊው የዲጂታላይዜሽን ግስጋሴ ጋር ጥብቅ ቁርኝት አለው።
እስካሁንም ከ5 ሚሊዮን በላይ ወጣቶች ሥልጠናቸውን ማጠናቀቃቸው ፕሮግራሙ ያገኘውን ሰፊ ሀገራዊ ተቀባይነት በጉልህ የሚያረጋግጥ ነው።
ጥሪው ወጣቶችን ማዕከል ማድረጉ፣ የኢትዮጵያን የሥነ-ሕዝብ ዕድል በአግባቡ ለመጠቀም የተቀየሰ ስትራቴጂያዊ እርምጃ መሆኑን ያሳያል።
ከ60 በመቶ በላይ የሚሆነው ሕዝቧ ዕድሜው ከ25 ዓመት በታች በሆነባት ኢትዮጵያ፣ ወጣቱን የቴክኖሎጂ ተጠቃሚ ብቻ ሳይሆን ፈጣሪ እና አልሚ ማድረግ የሀገራችንን መጻኢ ብልጽግና ይወስናል።
በነጻ የሚሰጡት ዓለም አቀፍ የምሥክር ወረቀቶች፤ ወጣቶች ያለ ክፍያ እና ያለ ቦታ ገደብ ባሉበት ሆነው በዓለም አቀፉ የጊግ ኢኮኖሚ (Gig economy) ውስጥ ተወዳዳሪ እንዲሆኑ ሰፊ ዕድል ይከፍታሉ።
በተጨማሪም ወጣቶች ሀገር በቀል ችግሮችን የሚፈቱ አዳዲስ የፊንቴክ፣ የአግሪቴክ እና የኤሌክትሮኒክስ ንግድ መተግበሪያዎችን በመገንባት የራሳቸውን የቴክኖሎጂ ቢዝነሶች (ስታርት-አፖች) እንዲፈጥሩ ያስችላቸዋል።
ይህ ሂደት ወጣቶችን ከሥራ ጠባቂነት ወደ ሥራ ፈጣሪነት በማሸጋገር፣ የሀገራችንን የማክሮ-ኢኮኖሚ መረጋጋት የሚያግዝ እና የወጣቶችን ተስፋ በጽኑ መሠረት ላይ የሚያቆም ነው።
የጠቅላይ ሚኒስትር ዐቢይ አሕመድ (ዶ/ር) ጥሪ የወቅቱን የዓለም አቀፍ ቴክኖሎጂ ፍጥነት እና የኢትዮጵያን የዲጂታላይዜሽን ጉዞ በሚገባ ያገናዘበ ብስል የፖሊሲ አመራር ማሳያ ነው።
ወጣቶች የክረምቱን ጊዜ በከንቱ ከማባከን ይልቅ የነገውን የቴክኖሎጂ ዓለም ለመምራት የሚያስችል ክህሎት መጨበጣቸው፣ የየራሳቸውን ሕይወት ከመቀየሩም በላይ ሀገራዊ ብልጽግናን ያፋጥናል።
ከ5 ሚሊዮን በላይ ኢትዮጵያውያን ወጣቶች ተቀላቅለውት የሚገኘው ይህ ታላቅ የዲጂታል ንቅናቄ የነገዋን ኢትዮጵያ በቴክኖሎጂ የበለጸገች እና በዓለም አቀፍ መድረክ ተፎካካሪ እንድትሆን የሚያስችላት መጻኢ ተስፋዋ ብሩህ መሆኑን በግልጽ ያሳያል።
መረጃው የEBC ነው።

በሦስት ዋና ዋና ስትራቴጂካዊ ዘርፎች ላይ ያተኮረው ስምምነት
የአዲስ አበባ ከተማ አስተዳደር ሥራና ክህሎት ቢሮ፣ ከጣሊያኑ ማርኬ ክልል (Marche Region) መንግሥት እና ለአፍሪካ የልማት አጋርነት ከሚሠራው APA-CVM ከተባለው መንግሥታዊ ያልሆነ ድርጅት ጋር በጋራ ለመሥራት የሚያስችለውን የ1 ቢሊዮን ብር የመግባቢያ ስምምነት ሰነድ ተፈራረመ።
የመግባቢያ ስምምነቱን የአዲስ አበባ ሥራና ክህሎት ቢሮ የዉጤት ተኮር ሥልጠናና ተቋማት ልማት ዘርፍ ሃላፊ ወይዘሮ ዳግማዊት ግርማ፣ የAPA-CVM የምሥራቅ አፍሪካ ቀጣና ተወካይ ጆናታን አስካኒ (Jonathan Ascani) እንዲሁም የማርኬ ሪጅን የዓለም አቀፍ ትብብር አስተባባሪ አቶ ናታሊኖ ባርቢዚ (Natalino Barbizzi) በይፋ ተፈራርመውታል።
ለሚቀጥሉት ሦስት ዓመታት የሚቆየውና በጣሊያን ማርኬ ሪጅን መንግሥት ሙሉ በሙሉ በገንዘብ የሚደገፈው ይህ የልማት ፕሮጀክት፣ በዋነኝነት በሦስት ዋና ዋና ስትራቴጂካዊ ዘርፎች ላይ አተኩሮ እንደሚንቀሳቀስ ታውቋል።
እነዚህም የቴክኒክና ሙያ (TVET) ተቋማትን አቅም በማጎልበት የሰልጣኞችንና የአሰልጣኞችን የሙያ ክህሎት ማሳደግ፣ ለሥልጠና ተቋማቱ አስፈላጊ የሆኑ ዘመናዊ የመማሪያና የቴክኖሎጂ ግብአቶችን ማሟላት እንዲሁም በጥቃቅንና አነስተኛ ኢንተርፕራይዞች ለተደራጁ ወጣቶችና ባለሙያዎች የሥራ ዕድልና የገበያ ትስስር ማመቻቸት ናቸው።
መረጃው የአዲስ አበባ ሥራና ክህሎት ቢሮ ነው

በቆዳ እና በቆዳ ውጤቶች ዘርፍ ብቃት ያለው ሙያዊ ሥልጠና በመስጠት ዘላቂ የሥራ ዕድል ለመፍጠር በሚያስችሉ ሁኔታዎች ላይ ውይይት ተደረገ
የኦሮሚያ ሥራ ዕድል ፈጠራና ክህሎት ቢሮ ከጣሊያን ማርቼ ክልላዊ መንግሥት(Marche region) ጋር በመሆን በቆዳ እና በቆዳ ውጤቶች ዘርፍ ብቃት ያለው ሙያዊ ሥልጠና በመስጠት ዘላቂ የሥራ ዕድል ለመፍጠር በቅንጅት መስራት በሚቻልበት ሁኔታ ላይ ተወያይቷል።
የቢሮው ኃላፊ ኢንጂነር ኤባ ገርባ እንደገለጹት፤ ይህ ውይይት በቆዳ እና በቆዳ ውጤቶች ዘርፍ ጥራትና ብቃት ያለው ሥልጠና ለዜጎች ተደራሽ ማድረግ፣ የቴክኒክና ሙያ ሥልጠና ኮሌጆችን የማስፈጸም አቅም ማጠናከር፣ የአገራችንን የማምረት አቅም ማሳደግ እንዲሁም የቆዳ እና የጫማ ምርት ዘርፍን የዘላቂ ሥራ ዕድል ምንጭ ለማድረግ የሚያስችል ትልቅ እርምጃ ነው።
ሁለንተናዊ የኢኮኖሚ ልማትን ለማረጋገጥ፣ ዘላቂ የኢንዱስትሪ ልማት ለመፍጠር፣ የኢንተርፕራይዞቻችንን የመነሻ ገንዘብ እጥረት ለመቅረፍ እና ዓለም አቀፍ ትብብርን ለማጠናከር ውይይቱ ከፍተኛ አስተዋጽኦ እንዳለውም ኢንጂነር ኤባ ተናግረዋል።
የማርቼ ክልላዊ መንግሥት ተወካይ አቶ ናታሊኖ ባርቢዚ በበኩላቸው፤ ክልላዊ መንግሥታቸው በቆዳና በጫማ ምርት ዘርፍ የሙያ ሥልጠናን ለማጠናከር፣ የሰው ኃይል አቅምን ለማሳደግ እና ዘላቂ የሥራ ዕድል ለመፍጠር ከሲቪኤም (CVM) ከሚባለው መንግሥታዊ ያልሆነ ድርጅት እና ከዩኒዶ (UNIDO) ጋር በመሆን ከኦሮሚያ ሥራ ዕድል ፈጠራና ሙያ ቢሮ ጋር ለመሥራት ማቀዱን ገልጸዋል።
በአዲስ አበባ ከተማ በተከናወኑ ሥራዎች የተመዘገቡ ስኬቶችን ወደ ኦሮሚያ ክልል ለማስፋፋት ይህ ውይይት ወሳኝ መሆኑንም አክለው ገልጸዋል።
ዘገባው የኦሮሚያ ሥራ ዕድል ፈጠራና ክህሎት ቢሮ ነው

የዘርፉን አዲስ እሳቤ በውጤታማነት ለመተግበር የሚስችል አቅም መፍጠርን ያለመ ስልጠና
የአፋር ብሔራዊ ክልላዊ መንግስት ፣የሥራና ክህሎት ቢሮ ከክልል፣ ከዞን፣ ከወረዳና ከቴክኒክና ሙያ ተቋማት ለተውጣጡ የዘርፉ አመራሮችና ባለሙያዎች የአቅም ግንባታ ስልጠና መስጠት ጀመረ፡፡
በጣልያን ፕሮጀክትና በሴቭ ዘ ችልድረን የፋይናንስ ድጋፍ የተዘጋጀው ይህ ስልጠና በዘርፉ አዲስ እሳቤ፣ በባዮሜትርክስ ምዝገባና በዕቅድና ሪፖርት ዝግጅት ላይ ያተኩራል፡፡
መድረኩን በንግግር የከፈቱት የአፋር ክልል፣ የሥራና ክህሎት ቢሮ ኃላፊ አቶ አህመድ ኢብራሂም ስልጠናው በዋነኛነት በየእርከኑ የሚገኙ አመራርና ባለሙያዎች የዘርፉን አዲስ እሳቤ በውጤታማነት ለመተግበር የሚስችላቸውን አቅም ለማጎልበት ያለመ መሆኑን ተናግረዋል፡፡
በክልሉ በሚገኙ 30 የሥራ ማዕከላት የሥራ ፈላጊዎች የባዮ ሜትሪክስ ምዝገባ በመካሄድ ላይ እንደሚገኝ የገለፁት ቢሮ ኃላፊው የምዝገባ ሂደቱን በሚጠበቀው ደረጃ ሙሉ ለሙሉ ዲጂታላይዝ ለማድረግ የሚያስችል ዕውቀትን ቢሮው ተደራሽ ለማድረግ እየሠራ እንደሚገኝ አስረድተዋል፡፡
በሥራና ክህሎት ዘርፍ በሀገር ዓቀፍ ደረጃ የተያዙ ግቦች እንዲሳኩ የሚከናወኑ ተግባራት ሁሉ ከዕቅድ ዝግጅት የሚጀምሩ እንደመሆናቸው ‹‹አንድ ዕቅድ፣ አንድ ሪፖርት›› የሚለውን የሚኒስቴር መ/ቤቱን መርህ ለመተግበርና የመረጃ ጥራትን ለማረጋገጥ ስልጠናው ጉልህ ሚና አንደሚኖረው ተመላክቷል፡፡
የሥራ ማዕከላትን ለማጠናከር በተጀመሩ ሰፋፊ የሪፎርም ተግባራት ወጣቶችን ከአዳዲስ የሥራ ዕድል ዕድሎች ተጠቃሚ ለማድረግ የሚያስችሉ ተስፋ ሰጪ ለውጦች እየተስተዋሉ እንደሚገኙ ያነሱት የቢሮ ኃላፊው የማዕከላቱን ባለሙያዎች አቅም ለማሳደግ የሚሰጡ መሰል ስልጠናዎች ፈጣን፣ ቀልጣፋና ሙሉ በሙሉ ዲጂታላይዝ የሆኑ የሥራ ማዕከላትን እውን ለማድረግ የተያዘውን ግብ ለማሳካት እንደሚያስችሉ ናቸው ብለዋል፡፡
በመጨረሻም ሰልጣኞች ያገኙትን እውቀት ተጠቅመው የክልሉን ሰፊ የተፈጥሮ ፀጋ በማልማት የዜጎችን ተጠቃሚነት በላቀ ደረጃ ለማረጋገጥ በትኩረት መስራት እንደሚኖርባቸውም የቢሮ ኃላፊው አሳስበዋል፡፡
የቴክኒክና ሙያ ተቋማት ብቁ ባለሙያዎች የሚፈልቁባቸው ማዕከላት ለማድረግ በክልሉ ሁሉም አካባቢዎች የተጀመሩ የለውጥ ሥራዎችን ተጠናክረው መቀጠል እንደሚገባቸውም በአፅንኦት አንስተዋል፡፡

በዜጋ ተኮር ዲፕሎማሲ የውጭ ሀገር ሥራ ስምሪት ቅንጅታዊ አሠራሮችን ለማጠናከር ልዩ ትኩረት እንደሚሰጥ ተገለጸ
የሥራና ክህሎት ሚኒስቴር እና የውጭ ጉዳይ ሚኒስቴር በውጭ ሀገር ሥራ ስምሪት ያለውን ቅንጅታዊ አሠራር በዜጋ ተኮር ዲፕሎማሲ መርህ መሠረት በማጠናከር፣ የዜጎችን መብት፣ ደህንነትና ተጠቃሚነት የሚያረጋግጡ ተግባራት ላይ ልዩ ትኩረት እንደሚሰጥ በሁለቱ ተቋማት ከፍተኛ አመራሮች ባካሄዱት የጋራ ውይይት ተገልጿል።
በውይይቱ የሥራና ክህሎት ሚኒስትር ክብርት ወ/ሮ ሙፈሪሃት ካሚል፣ ክቡር አምባሳደር ደዋኖ ከድር፣ ክቡር አምባሳደር አዲስዓለም መለሰ እንዲሁም የሁለቱ ተቋማት ከፍተኛ የሥራ ኃላፊዎች ተሳትፈዋል።
ውይይቱ በውጭ ሀገር ሥራ ስምሪት ዘርፍ እስካሁን የተመዘገቡ ውጤቶችን፣ ያጋጠሙ ተግዳሮቶችን እና የቀጣይ የጋራ ትኩረት አቅጣጫዎችን በስፋት ገምግሟል። በተለይም የሁለቱ ሚኒስቴሮች የተቀናጀ አሠራር ሕጋዊ የውጭ ሀገር ሥራ ስምሪትን ይበልጥ ምቹ፣ ቀልጣፋ፣ ግልጽና ተደራሽ ለማድረግ ወሳኝ መሆኑ ተገልጿል።
በዚህ መሠረት የመረጃ ልውውጥን፣ የተቀናጀ ክትትልን፣ የጋራ የተግባር አፈጻጸምን እና የተቋማት ቅንጅታዊ አሠራርን ይበልጥ በማጠናከር የሕጋዊ የውጭ ሀገር ሥራ ስምሪት አገልግሎቶችን ቀልጣፋና ተደራሽ ለማድረግ፣ የዜጎችን መብት፣ ደህንነትና ክብር በተሻለ ሁኔታ ለማስጠበቅ እንዲሁም የዜጎችንና የሀገሪቱን ብሔራዊ ጥቅም የሚያሳድጉ ተግባራት ልዩ ትኩረት እንደሚሰጥ ተመላክቷል።
በውይይቱ ላይ በዜጋ ተኮር ዲፕሎማሲ መርህ መሠረት በሀገር ውጭ የሚሰሩ ኢትዮጵያውያን መብትና ደህንነት እንዲጠበቅ፣ ሕጋዊ የሥራ ስምሪት ሥርዓቱ የተቀናጀ፣ ግልጽ እና ተጠያቂነት ያለበት እንዲሆን ሁለቱ ተቋማት ያላቸውን ትብብር የበለጠ እንደሚያጠናክሩም ተገልጿል።
ይህ ቅንጅታዊ አሠራር ሕጋዊ የውጭ ሀገር ሥራ ስምሪትን የበለጠ ውጤታማ ከማድረጉ ባሻገር፣ የዜጎችን ሁለንተናዊ ተጠቃሚነት በማሳደግ የሀገሪቱን ብሔራዊ ጥቅም ለማስጠበቅ ጉልህ አስተዋፅኦ እንደሚኖረውም ተጠቁሟል።

በውጭ ሀገር ሥራ ሥምሪት ላይ የተኮረ ውይይት ተካሄደ
የሥራና ክህሎት ሚኒስቴር በውጭ ሀገር ሥራ ሥምሪት የ2018 በጀት ዓመት አፈፃፀምና በ2019 በጀት ዓመት ዕቅድ ላይ ትኩረቱን ያደረገ የምክክር መድረክ ከውጭ ሀገር አሠሪና ሠራተኛ አገናኝ ኤጀንሲዎች ጋር አካሄደ፡፡
በውይይቱ መክፈቻ ላይ ንግግር ያደረጉት የአሠሪና ሠራተኛ ዘርፍ ሚኒስትር ዴኤታ ክቡር አቶ ዳንኤል ተሬሳ፤ በ2018 ዓ.ም በጀት ዓመት ከተከናወኑ ዋና ዋና ተግባራት መካከል የውጭ ሀገር ሥራ ሥምሪት አዋጅን ወደ ሥራ ማስገባት ዋንኛው እንደሆነ በመጠቆም አዋጁን ለማስፈፀም የሚያስችል መመሪያም በዝግጅት ላይ እንደሚገኝ አስታውቀዋል፡፡
ከዚህ በተጨማሪም የስልጠናና የምዘና ተቋማት አገልግሎትን ጨምሮ የመዳረሻ ሀገራት አሰራሮችን ማሻሻል፣ ለአቅም ግንባታ የሚረዱ ስልጠናዎችን መስጠትና ከኤጀንሲዎች ጋር በጋራ ለመስራት የሚያስችሉ የምክክር መድረኮችን ማካሄድ በልዩ ትኩረት ከተከናወኑ ተግባራት መካከል እንደሚጠቀሱ ተብራርቷል፡፡
በነበሩት የተቀናጁ ጥረቶች በበጀት ዓመቱ ከ630 ሺህ በላይ ዜጎችን ከውጭ ሀገር ሥራ ሥምሪት ተጠቃሚ ማድረግ መቻሉ በመድረኩ ተመላክቷል፡፡
በቀጣዩ የ2019 በጀት ዓመትም የሰለጠነና በከፊል የሰለጠነ የሰው ኃይል በስፋት የመላክ ዕቅድ መያዙን የገለፁት ክቡር አቶ ዳንኤል ተሬሳ፤ በዘርፉ የሚስተዋሉ ህገወጥ አሰራሮችን ለማስወገድ በትኩረት እንደሚሰራም በአፅንኦት ተናግረዋል፡፡
ተገቢውን የገበያ ጥናት በማካሄድ የመዳረሻ ሀገራትን ማስፋት፣የአሰራር ችግሮችን በጥናት በመለየት ዘላቂ መፍትሔ የሚሰጡ ሥርዓቶችን መዘርጋት ዘርፉ ምቹና ውጤታማ ሥነ ምህዳር እንዲኖረው ለማስቻል የተቀመጡ ዋና ዋና የትኩረት አቅጣጫዎች መሆናቸው ተጠቅሷል፡፡
በውይይቱ ማጠቃለያ ላይ ክቡር ሚኒስትር ዴኤታው የውጭ ሀገር ሥራና ሠራተኛ አገናኝ ኤጀንሲዎች የዜጎችንና የሀገርን ተጠቃሚነት ለማረጋገጥ ያላቸውን ጉልህ ድርሻ ተገንዝበው ሥራውን በኃላፊነትና በታማኝነት መፈፀም እንዳለባቸው አሳስበዋል፡፡
አክለውም በኤጀንሲዎች መካከል የሚስተዋሉ ችግሮችን በውይይት መፍታት፣ ጠንካራ አደረጃጀት በመፍጠር ህገወጥ አሰራሮችን በጋራ መታገል እንደሚገባም ጠቁመዋል፡፡

ኢትዮጵያ በዓለም አቀፉ የብየዳ ኢንስቲትዩት (IIW) የ2026 ይፋዊ የአባልነት ሰርተፊኬት ተረከበች
ኢትዮጵያ በዓለም አቀፉ የብየዳ ኢንስቲትዩት (International Institute of Welding–IIW) 79ኛ ዓመታዊ ጉባኤ በቦርድ አባላት በሙሉ ድምፅ ከጸደቀች በኋላ፣ የ2026 ይፋዊ የአባልነት ሰርተፊኬቷን በይፋ ተረክባለች።
ኢትዮጵያን በዚህ ዓለም አቀፍ ተቋም የሚወክለው የኢፌዲሪ ቴክኒክና ሙያ ስልጠና ኢንስቲትዩት የብየዳ ልህቀት ማዕከል ነው።
ይህ አባልነት ኢትዮጵያ በብየዳ ቴክኖሎጂ፣ በክህሎት ልማት እና በዓለም አቀፍ የቴክኒክና ሙያ ትብብር ውስጥ እያሳየች ያለችውን እድገት የሚያረጋግጥ ታላቅ ዓለም አቀፍ እውቅና ነው።
የIIW የአስተዳደር፣ ኮሙኒኬሽን እና ሁነቶች ኃላፊ ሮሳሪያ ሩሶ (Rosario Russo) በላኩት የእንኳን ደስ አላችሁ መልዕክት፣ ኢትዮጵያን ወደ IIW ቤተሰብ በመቀላቀሏ ያላቸውን ደስታ ገልጸው፣ ይህ አባልነት የዕውቀት ልውውጥን ለማጠናከር፣ የሙያ ብቃትን ለማሳደግ፣ ዓለም አቀፍ የሙያ ትስስርን ለማስፋት እና የጋራ ምርምርና ፈጠራን ለማበረታታት አስፈላጊ መሠረት እንደሚሆን ማስታወቃቸውን ከኢኒስቲትዩቱ ያገኘነው መረጃ ያመላክታል።
ለኢትዮጵያ ይህ ስኬት ዓለም አቀፍ ደረጃን የጠበቀ የብየዳ ስልጠና፣ የብቃት ማረጋገጫ እና የቴክኖሎጂ ሽግግር ለማጠናከር አዲስ እድል የሚፈጥር ሲሆን፣ ለኢንዱስትሪ፣ ለኮንስትራክሽን፣ ለማኑፋክቸሪንግ እና ለሌሎች የምርት ዘርፎች በዓለም አቀፍ ደረጃ የሰለጠነ የሰው ኃይል ለማፍራት ከፍተኛ አስተዋጽኦ ይኖረዋል።
የኢፌዲሪ ቴክኒክና ሙያ ስልጠና ኢንስቲትዩት የብየዳ ልህቀት ማዕከል በዘርፉ በሀገር ደረጃ ብቸኛ የልህቀት ማዕከል ሲሆን፣ ዓለም አቀፍ ብቃት ያላቸውን ባለሙያዎች በማፍራት የኢትዮጵያን የኢንዱስትሪ ተወዳዳሪነት ለማሳደግ ከፍተኛ ሚና እየተጫወተ ይገኛል።