mols mols

የትምህርት ሥርዓትን ከገበያ ፍላጎት ጋር ማጣጣም ዘላቂ የሥራ ዕድል ለመፍጠር ወሳኝ ነው
የትምህርት ሥርዓትን ከገበያ ፍላጎት ጋር ማጣጣም ዘላቂ የሥራ ዕድል ለመፍጠር ወሳኝ መሆኑን የተባበሩት መንግስታት ድርጅት ምክትል ዋና ጸሀፊ አሚና መሐመድ ገለጹ።
በሥራ ፈጠራ ላይ ትኩረቱን ያደረገ የአፍሪካ ዴቨሎፕመንት ኢምፓክት ፎረም 2026 በተባበሩት መንግሥታት የአፍሪካ ኢኮኖሚክ ኮሚሽን (ECA) መካሄድ ጀምሯል።
የተባበሩት መንግስታት ድርጅት ምክትል ዋና ጸሀፊ አሚና መሐመድ በዚሁ ወቅት እንዳሉት፤ አፍሪካ ታላላቅ ተግዳሮቶችና መልካም አጋጣሚዎች ባሉበት ወሳኝ መስቀለኛ መንገድ ላይ ትገኛለች፡፡
በዚህ ወቅት ጥራትና ዘላቂነት ያላቸው የሥራ ዕድሎችን ለመፍጠር ዘመናዊ የትምህርት ሥርዓቶችን ከገበያው ትክክለኛ ፍላጎት ጋር ማጣጣም እንደሚገባ አስገንዝበዋል።
በተለይም በፍጥነት እያደገ የመጣውን የአፍሪካ ወጣት ቁጥር ከግምት ውስጥ በማስገባት፣ በሚሊዮኖች የሚቆጠሩ ጥራት ያላቸው የሥራ ዕድሎችን መፍጠር አፋጣኝ ቅድሚያ የሚሰጠው ጉዳይ ሊሆን እንደሚገባ አሳስበዋል።
ባለፉት ዓመታት ከአምራች ኢንዱስትሪ መስፋፋት እስከ ወጣቶች የሥራ ዕድል ፈጠራና የክህሎት ልማት ያሉ የአፍሪካን አንገብጋቢ ተግዳሮቶች ለመፍታት ከመንግሥታት፣ ከቀጣናዊ ተቋማትና ከግል ዘርፉ ጋር በጋራ ሲሠራ መቆየቱን አስታውሰዋል።
ከዚህ የጋራ ሥራም ትልቅ ትምህርት መገኘቱን ጠቅሰው፣ምርምር፣መረጃና ማስረጃዎች ብቻቸውን ለውጥ አያመጡም፤ ከንግግርና ከሪፖርት ባለፈም ወደ ተግባራዊ እርምጃ መግባት አማራጭ የሌለው ጉዳይ ነው ብለዋል።
የስራ ዕድሎችን መፍጠር በመንግሥታት ብቻ ሊሳካ እንደማይችል ጠቁመው፤ይህም የፖሊሲ አውጪዎችን፣ ተመራማሪዎችን፣ የልማት አጋሮችንና የግል ዘርፉን በአንድ ላይ የሚያገናኝ ንቁ ሥነ-ምሕዳርን እንደሚጠይቅ አስረድተዋል።
የዘንድሮው ፎረም መፍትሔዎችን ለመለየት፣ጠንካራ አጋርነትን ለመገንባትና ተግባራዊ የመድረሻ መንገዶችን ለመንደፍ የተለያዩ ባለድርሻ አካላትን በአንድ ላይ ያገናኘ ሲሆን፣ከውይይት ባለፈ በመላው አፍሪካ ላሉ ወጣቶች ወደ ተጨባጭ ውጤት የሚቀይሩ ትርጉም ያላቸው ተግባራት እንደሚጠበቁበት ተመላክቷል። መረጃው የኢዜአ ነው። See less

ከ218 ሚሊዮን ብር በላይ ወጪ የተገነባው የማዕክ-ዱግሲየ የክህሎትና የእደ-ጥበብ ኮሌጅ ተመረቀ
በሶማሌ ክልላዊ መንግሥት ,በአውባሬ ከተማ ከ218 ሚሊዮን የኢትዮጵያ ብር በላይ በሆነ ወጪ የተገነባው የማዕክ-ዱግሲየ የክህሎትና የእደ-ጥበብ ኮሌጅ በዛሬው ዕለት በይፋ ተመርቋል።
ሪቫን በመቁረጥ ኮሌጁን በይፋ ያስመረቁት የሶማሌ ክልል ፕሬዝዳንት አቶ ሙስጠፌ ሙሐመድ ዑመር እና የሥራ ዕድል ፈጠራና ክህሎት ቢሮ ኃላፊ አቶ ሁሴን ጋይድ ናቸው።
ይህ ግዙፍ የክህሎት ማሰልጠኛ ተቋም በ(25ሺ ካሬ ሜትር መሬት ላይ ያረፈ ሲሆን፥ በውስጡም 21 የተለያዩ የሕንጻ ብሎኮችን አካቷል። ኮሌጁ በተለያዩ የሙያና የቴክኒክ ዘርፎች በየዓመቱ ለ1,500 ሰልጣኞች ጥራት ያለው ትምህርትና ስልጠና ለመስጠት የሚያስችል አቅም እንዳለው ተገልጿል።
ተቋሙ የተሟላ የትምህርትና የማሰልጠኛ አገልግሎት ለመስጠት የሚያስችሉ እንደ የተማሪዎች መኝታና የመመገቢያ አዳራሾች፣ የመማሪያ ክፍሎች፣ የተግባር ልምምድ ማድረጊያ ማዕከላት (ወርክሾፖች)፣ የአስተዳደር ቢሮዎችና አጠቃላይ አገልግሎት መስጫዎችን በውስጡ ይዟል።
ከዚህ በተጨማሪም የዚህ መሰል ከፍተኛ ኮሌጆችን ደረጃ የጠበቁ የተማሪዎች መዝናኛ ስፍራዎችና የስፖርት ማጫወቻ ሜዳዎች ተካተውለታል።
በምረቃው ሥነ-ሥርዓት ማጠቃለያ ላይ የክልሉ ከፍተኛ የሥራ ኃላፊዎች በኮሌጁ ቅጥር ግቢ ውስጥ የችግኝ ተከላ መርሐ-ግብር አከናውነዋል።

ሉሲ ገበያ- የኢንተርፕራይዞችን የገበያ ምህዳር የማስፋት ጅምር
የሥራና ክህሎት ሚኒስቴር የአገር በቀል ኢንተርፕራይዞችን የንግድ ተወዳዳሪነት ለማረጋገጥና የገበያ መሰረተ ልማትን ለማስፋት፣ በኢትዮጵያ ሥራ ገበያ መረጃ ሥርዓት በኩል ያበለጸገው «ሉሲ ዲጂታል ገበያ» (Lucy Digital Market) ወደ ሥራ መግባቱ ይታወቃል።
ይህንን ስትራቴጂካዊ ዕቅድ ወደ መሬት ለማውረድና የፕላትፎርሙን አጠቃቀም ለማስፋፋት፣ በአዲስ አበባ ከተማ የሥራና ክህሎት ቢሮ አማካኝነት ከ119 ወረዳዎች ለተውጣጡ የገበያ እና ፕሮሞሽን ባለሙያዎች እና ከ15 የቴክኒክና ሙያ ኮሌጆች ለተመረጡ ሰልጣኞች እየተሰጠ ያለው ስልጠና ተጠናክሮ ቀጥሏል።
ስልጠናው በዋናነት በኢ-ኮሜርስ (e-Commerce)፣ በሶሻል ሚዲያ ማርኬቲንግ፣ በዲጂታል ኮሙዩኒኬሽን እና የሉሲ ፕላትፎርም አጠቃቀም በመሳሰሉ ርዕሰ ጉዳዮች ዙሪያ አተኩሮ እየተሰጠ ይገኛል።
የሥራና ክህሎት ሚኒስቴር የገበያ ጥናትና ትስስር ዴስክ ኃላፊ አቶ ሰለሞን ታደሰ በመድረኩ እንደገለጹት ስልጠናው ሲጠናቀቅ እያንዳንዱ ባለሙያ ቢያንስ የ20 ኢንተርፕራይዞችን ምርትና አገልግሎት ወደ ስራ በማስገባት፣ በቀጣይ 3 ወራት በአጠቃላይ ከ3 ሺህ በላይ ኢንተርፕራይዞችን ወደ ዲጂታል የገበያ ትስስሩ ለማስገባት ግብ ተቀምጧል።
አክለውም ይህ ንቅናቄ ኢንተርፕራይዞችን ወደ ዘመናዊው የዲጂታል ዓለም ለማሻገር እና የገበያ ተደራሽነታቸውን ለማፋጠን ከፍተኛ ሚና እንደሚጫወት ገልጸዋል።

ጠንካራ የሙያ ብቃት ምዘና ሥርዓት፣ ብቁና ተወዳዳሪ ዜጋ፤ ጠንካራ ሀገር!
የክህሎት ልማት ዘርፋችን ብቁና ተወዳዳሪ ዜጎችን የማፍራት ሀገራዊ ተልዕኮውን በስኬት እንዲወጣ የሙያ ብቃት ምዘና ሚና የማይተካ ድርሻ አለው፡፡
የሙያ ብቃት ምዘናና ማረጋገጫ ሥርዓታችን ተራ የፈተና ሂደት አይደለም፡፡ ይልቁንም ክፍተትን ለይቶ መሙላት እንዲቻልና የዜጎችን ክህሎት ወደ ላቀ ምርታማነት፣ ምርታማነትን ደግሞ ወደ ሀገራዊ እድገት የሚቀይር የሰው ሀብት ልማታችን ዋነኛ የጥራት ማረጋገጫ መሣሪያ ነው!
ይህንን ሀገራዊ ሥርዓት ይበልጥ ዘመናዊ፣ ተደራሽ እና ቀልጣፋ ለማድረግ ከኢትዮጵያ የሥራ ገበያ መረጃ ሥርዓት ጋር ሙሉ በሙሉ የማስተሳሰር እና የዲጂታላይዝ የማድረግ ሥራ ተጠናቋል። በዚህም፦
⚡ የምዘናና የብቃት ማረጋገጫ ሂደቱ ፈጣን፣ ቀልጣፋና ምቹ እንዲሆን እና
🛡️ በዘርፉ ይስተዋሉ የነበሩ የአሠራር ክፍተቶችን እና ብልሹ አሠራሮችን ከመሠረቱ የሚቀይር ግልጽ ሥርዓት ለመፍጠር ያስችላል።
ይህንን ሁሉን አቀፍና ደረጃውን የጠበቀ ሥርዓት በመላው ሀገሪቱ ለማስፈን አስቻይና ሰፊ መዋቅር በየደረጃው አለ። በእስካሁኑ ሂደትም፦
🏢 14 የክልልና ከተማ አስተዳደር የሙያ ብቃት ምዘና ኤጀንሲዎች/ባለሥልጣናት፣
🎯 1,843 የምዘና ማዕከላት በመላው ሀገሪቱ አገልግሎት በመስጠት ላይ ይገኛሉ።
እነዚህ 14 የክልልና ከተማ አስተዳደር መዋቅሮቻችን ዓለም አቀፍ ደረጃውን የጠበቀ አገልግሎት እንዲሰጡ ለማስቻል፣ ወደ ዓለም አቀፉ የጥራት ሥራ አመራር ሥርዓት (Quality Management System – ISO) እንዲገቡ የማድረግ ሰፊ ሥራም እየተከናወነ ይገኛል።
በዚህ ቀጣይነት ባለው ጥረት እስካሁን ሚኒስቴር መሥሪያ ቤታችንን እና ተጠሪ ተቋሞቻችንን ጨምሮ በዘርፋችን የዓለም አቀፉን የጥራት ሥራ አመራር ሥርዓት እውቅና ያገኙ ተቋማት ቁጥር ከ20 በላይ ደርሷል።

«ሉሲ ገበያ»፦ ለኢንተርፕራይዞች ዲጂታል ሽግግር
በዚህ እጅግ ፈጣን የቴክኖሎጂ ዘመን የንግድ ተወዳዳሪነትን ለማረጋገጥ ዲጂታል ስርዓቶች መጠቀም ምርጫ ሳይሆን የግድ ነው።
የሥራና ክህሎት ሚኒስቴር ከኤስ ኤን ቪ ሊዌ ፕሮግራምና ከአዲስ አበባ ሥራና ክህሎት ቢሮ በመተባበር የኢንተርፕራይዞችን አቅም ለመገንባትና ምርቶቻቸውን ወደ «ሉሲ ዲጂታል ገበያ» ለማስገባት ለባለሙያዎች እየሰጠ ያለው ስልጠና ለዚህ ትልቅ ማረጋገጫ ነው።
በዚህ የዲጂታል ሽግግር ውስጥ ኢንተርፕራይዞች ምርትና አገልግሎታቸውን በገበያ ላይ ስኬታማ ለማድረግ ብራንዲንግ (Branding) እና ድጅታል ማስታወቂያ መጠቀም ወሳኝ ነው፡፡
ጠንካራ ብራንድ የገነቡ ኢንተርፕራይዞች በደንበኞች ዘንድ ከፍተኛ እምነት ያተርፋሉ፤ ይህም ደንበኛው ያለ ምንም ማንገራገር ምርቱን እንዲሸምት ያደርጋቸዋል።
የ«ሉሲ» የዲጂታል ገበያ ደግሞ ለኢንተርፕራይዞች ተራ የገበያ ቦታ ሳይሆን፣ ምርትና አገልግሎታቸውን በዘመናዊ መንገድ የሚያስተዋዉቁበትና ተጠቃሚነታቸውን ይበልጥ የሚያሳድጉበት ግዙፍ አማራጭ ነው፡፡
ይህ ፕላትፎርም ኢንተርፕራይዞች ከአካባቢያዊ ገበያ ወጥተው በመላው አገሪቱ አልፎም በዓለም አቀፍ ደረጃ ምርቶቻቸውን 24/7 (በየትኛውም ሰዓት) እንዲያስተዋውቁና እንዲሸጡ ዕድል ይፈጥራል።
በሉሲ ፕላትፎርም ላይ የሚደረግ የብራንዲንግና ማስታወቂያ ሥራም ባህላዊ ማስታወቂያዎች (እንደ ቢልቦርድና ጋዜጣ) ከፍተኛ ወጪ የሚጠይቁትን በማስቀረት በቀጥታ ምርትና አገልግሎት ወደ ፈላጊው ደንበኛ ዘንድ የሚያደርስ መንገድ ነው።
ከሁሉ በላይ አነስተኛ ኢንተርፕራይዞች ሳይቀሩ እንደ ትላልቅ ኩባንያዎች ሁሉ ምርታቸውን በሚያምር አቀራረብ (Professional Packaging & Digital Display) ለገበያ እንዲያቀርቡ ከማስቻል ባሻገር ከደንበኞቻቸው ጋር ቀጥተኛ ግንኙነት በመፍጠር አስተያየቶችን በፍጥነት እንዲቀበሉና አገልግሎታቸውን እንዲያሻሽሉ ይረዳል።
በአዲስ አበባ ከተማ ሥራና ክህሎት ቢሮ ስር ለሚገኙ የማርኬቲንግ እና ፕሮሞሽን ባለሙያዎችን በኢ-ኮሜርስ፣ ሶሻል ሚዲያ ማርኬቲንግ እና በሉሲ ፕላትፎርም አጠቃቀም ላይ እየተሰጠ ያለው ስልጠና ሲጠናቀቅ በአጭር ጊዜው በሺዎች የሚቆጠሩ ኢንተርፕራይዞች ፕላትፎርሙን ይቀላቀላሉ ተብሎ ይጠበቃል፡፡

የአፍሪካ የሥራ ዕድል ፈጠራ አህጉራዊ ጉባኤ በአዲስ አበባ ሊካሄድ ነው
በአፍሪካ የሥራ ዕድል ፈጠራን በተግባራዊ ፖሊሲዎች ለመደገፍ ያለመ አህጉራዊ ጉባኤ ለመጀመሪያ ጊዜ ሰኔ 4 እና 5 ቀን 2018 ዓ.ም በአዲስ አበባ ይካሄዳል።
የተባበሩት መንግሥታት የአፍሪካ ኢኮኖሚክ ኮሚሽን (ኢሲኤ) ያዘጋጀው ይህ ጉባኤ በአካዳሚክ ምርምሮች እና በፖሊሲ አፈጻጸሞች መካከል ያለውን ክፍተት መሙላትን ታሳቢ ያደረገ ነው።
የአፍሪካ ልማትና የተግባራዊ መፍትሄዎች መድረክ (ADIF 2026) የሚል ስያሜ ያለው ጉባኤ “በአፍሪካ የሥራ ዕድል ፈጠራን ለማሳደግ የሚረዱ ምርጥ ተሞክሮዎችና የፈጠራ መፍትሔዎች” በሚል መሪ ሀሳብ የሚካሄድ ነው።
ጉባኤው በአፍሪካ በፍጥነት እያደገ የሚገኘውን የወጣት ማኅበረሰብ፣ በዓመት ከ15 ሚሊዮን በላይ የሥራ ዕድል በመፍጠር አህጉራዊው ፍላጎትን ለመመለስ ከተያዘው ውጥን ጋር በቀጥታ የተገናኘ ነው።
ይህ አዲስ መድረክ ከተለመዱ አህጉራዊ ስብሰባዎች በተለየ፤ የፖሊሲ አፈጻጸምን በማፋጠን በዘርፉ ያለውን የፖሊሲ እና የአሰራር ሂደት ለማቀለጣፈ ያለመ መሆኑን ኢዜአ ከኢሲኤ ያገኘው መረጃ ያመለክታል።
በዚህም መሠረት የኢኮኖሚክ ኮሚሽኑ በገንዘብ እጥረት ምክንያት መሬት ያልወረዱ ጥናታዊ ምርምሮችን ወደ ተግባር ለመለወጥ፣ በጥቂት አካባቢዎች ተሞክረው ስኬታማ የሆኑ አነስተኛ የሙከራ ፕሮጀክቶችን ለማስፋት እንዲሁም አህጉር በቀል ምርጥ ተሞክሮዎችን በአገራት አጠቃላይ የኢኮኖሚ ፖሊሲዎች ውስጥ በቀጥታ ለማካተት አቅዷል።
አሠራሩ በልማት ላይ የሚፈሱ የአህጉሪቱ ኢንቨስትመንቶች አስተማማኝና ዘላቂ ውጤት እንዲያመጡ ለማድረግ ትልቅ እገዛ ይኖረዋል ተብሏል።
የፎረሙን ውጤታማነትና ተጠያቂነት በተረጋገጠ መልኩ ለመከታተልም፣ ከጉባኤው በፊት፣ በጉባኤው ወቅትና ከጉባኤው በኋላ የሚተገበር የአሠራር ሥርዓት ተዘርግቷል።
የመድረኩን ቀጣይነትና ትስስር አስተማማኝ ለማድረግ፣ የየዓመቱ መሪ ሀሳቦችን አንዱ ከሌላው ጋር በማስተሳሰር እና ተመጋጋቢ በማድረግ እንደሚዘጋጁ ኮሚሽኑ አስታውቋል።
በቀጣይ የሚካሄዱት ፎረሞች፤ የአፍሪካ አህጉራዊ ነፃ የንግድ ቀጣና (AfCFTA) ትግበራን ከአህጉራዊ የኢንዱስትሪ ልማት ስትራቴጂዎች ጋር ማስተሳሰር ጨምሮ ሌሎች የልማት የትኩረት መስኮችን ታሳቢ በማድረግ እንደሚካሄዱ ተመላክቷል። መረጃው የኢዜአ ነው።

እሴት ሰንሰለትን መሠረት ያደረገ የሥራ ዕድል ፈጠራ ውጤት አምጥቷል
በሶማሌ ክልል እሴት ሰንሰለትን (Value-Chain) መሠረት ያደረጉ የሥራ ፈጠራ ተግባራት ውጤት እያስመዘገቡ መሆኑ ተገለጸ።
የሱማሌ ክልል ሥራና ክህሎት ቢሮ ምክትል ኃላፊ ወ/ሮ ሂቦ አህመድ ፤ ሥራዎቹ በፌዴራል መንግስት የሥራ ፈጠራ ፖሊሲዎችና የሪፎርም ሃሳቦች መሠረት የተከናወኑ መሆኑን ገልጸው ተግባራቱ የክልሉ መንግስት ለወጣቶች ሥራ ፈጠራና ለአካባቢ ኢኮኖሚ ማነቃቂያ ያለውን ጽኑ ቁርጠኝነት ያሳዩ መሆኑንም ጠቁመዋል።
እንደ ወ/ሮ ሂቦ አህመድ ማብራሪያ፣ የገበያ ተኮር የልማት አቅጣጫን መሠረት ያደረገው ይህ ፕሮግራም በጅግጅጋና በጎዴ ከተሞች በሙከራ ደረጃ ተተግብሯል። ፕሮግራሙ በወተት፣ በእንቁላል፣ በሽንኩርትና በሥጋ ምርቶች አቅርቦት ላይ ትኩረት አድርጎ ተሰርቷል።
በሂደቱ 28 አቅራቢዎች (Supply Side) እና 22 ፈላጊዎች (Demand Side) በማስተሳሰር ከ2,200 በላይ ለሚሆኑ የአካባቢው ማህበረሰብ አባላት በትስስሩ የሥራ ዕድል ተጠቃሚ ማድረግ ተችሏል፡፡
ይህ አሰራር የአካባቢውን የምርት አቅርቦት ሥርዓት እና የገበያ ትስስር በእጅጉ ከማሻሻሉም በላይ ለአምራቾች አስተማማኝ ገቢ መፍጠሩንና የግሉን ዘርፍ ተሳትፎ ማሳደጉን ገልጸዋል።
ሂደቱም ክልሉ ወደ ዘላቂና ገበያ-ተኮር የሥራ ፈጠራ ሥርዓት እየተሸጋገረ መሆኑን የሚያሳይ ነው ብለዋል።

የሥራና ክህሎት ሚኒስቴር ከፍተኛ አመራሮችና ሠራተኞች «የመረጃ ሉዓላዊነት ለፖሊሲ ነፃነት» አገራዊ ኤግዚቢሽን ጎበኙ
ኤግዚቢሽኑ በኢትዮጵያ አስተማማኝ፣ ዘመናዊና የተቀናጀ የስታቲስቲክስ መረጃ ሥርዓት ለመገንባት የተከናወኑ አበይት ተግባራትን ይፋ ያደረገ ሲሆን፤ በመረጃና በማስረጃ ላይ የተመሠረቱ ፖሊሲዎችንና የልማት ዕቅዶችን ለመቅረጽ የተከናወኑ ስኬታማ ሥራዎች ለዕይታ በቅተውበታል።
በጉብኝቱ ወቅት እንደተገለጸው፤ መረጃ አገራዊ ራዕይ የሆነውን ጠንካራ ሀገረ መንግሥት የመገንባትና የፖሊሲ ሉዓላዊነትን የማረጋገጥ ጉዞ ዋነኛ ግብዓት ነው።
የዜጎችን እውቀትና ክህሎት በተደራጀ መንገድ በመጠቀም መረጃዎችን በሳይንሳዊ መንገድ የመሰብሰብ፣ የመተንተን እና በመረጃ ላይ የተመሠረቱ ፖሊሲዎችንና ስትራቴጂዎችን የማውጣት ልምድን ለማሳደግ የሚያስችል ሰፊ መሠረት እየተጣለ እንደሚገኝ ተመላክቷል።
ሚኒስቴር መሥሪያ ቤቱም ይህንን አገራዊ ራዕይ ለማሳካትና በክህሎት ልማት፣ በሥራ ዕድል ፈጠራና በኢንዱስትሪ ሰላም ዙሪያ የሚወጡ ፖሊሲዎችና ዕቅዶች ትክክለኛ መረጃን መሠረት ያደረጉ እንዲሆኑ በትኩረት እየሠራ መሆኑ ተገልጿል።

ሥራ አጥነትን ለመቅረፍ ስታርትአፖችን በሳይንሳዊ መንገድ መደገፍ አማራጭ የሌለው ጉዳይ ነው።
ክቡር አቶ ሰለሞን ሶካ
የሥራና ክህሎት ሚኒስትር ዴኤታ
የሥራና ክህሎት ሚኒስቴር ከኤስ ኤንቪ ሊዌ ፕሮግራም ጋር በመተባበር ያዘጋጀው የብሩህ ኢትዮጵያ 2025 የስታርትአፖች ቡትካምፕ የግምገማ እና የዕቅድ ማረጋገጫ መድረክ ተካሄደ።
በመድረኩ ላይ የሥራ ፈጣሪዎችን ተወዳዳሪነትና ክፍተቶች በዘላቂነት ለመፍታት የሚያስችል ሳይንሳዊ ጥናት ቀርቦ ሰፊ ውይይት ተደርጎበታል።
በመርሃ-ግብሩ ላይ የተገኙት የሥራና ክህሎት ሚኒስትር ዴኤታ ክቡር አቶ ሰለሞን ሶካ እንደገለጹት፤ ከማክሮ ኢኮኖሚ ዋና ዋና ፈተናዎች መካከል አንዱ የሆነውን ሥራ አጥነት በዘላቂነት ለመቅረፍ ስታርትአፖችን በሳይንሳዊ መንገድ መደገፍና ምቹ ሥነ-ምህዳር መፍጠር አማራጭ የሌለው ጉዳይ ነው።
ክቡር ሚኒስትር ዴኤታው አክለውም፣ በኢንተርፕረነርሺፕ ልማት ኢንስቲትዩት (EDI) በተጠናው ጥናት መሠረት ውጤታማነታቸው የተረጋገጠ እና ለአገር ውስጥ ገበያ ተግባራዊ መፍትሔ ይዘው የቀረቡ ስታርትአፖችን የፋይናንስ ተቋማት በባለቤትነት ሊደግፏቸው እንደሚገባ አሳስበዋል።
ተቋማቱ ለሥራ ፈጣሪዎች አስፈላጊውን የብድርና የፋይናንስ አቅርቦት በማመቻቸት ማህበራዊ ኃላፊነታቸውን እንዲወጡም ጥሪ አቅርበዋል።
የኢንተርፕረነርሺፕ ልማት ኢንስቲትዩት (EDI) ምክትል ዋና ዳይሬክተር አቶ ቦሩ ሸና በበኩላቸው፣ ጥናቱ ስታርትአፖች ከቡት ካምፕ ስልጠና በኋላ ቢዝነሳቸውን ወደ ተግባር ለመቀየር ያሉባቸውን ተጨባጭ ክፍተቶችና ፍላጎቶች ለመለየት ታስቦ የተሰራ መሆኑን አስገንዝበዋል።
በመድረኩ የተሳተፉ ባለድርሻ አካላት እንደጠቆሙት፤ በአሁኑ ወቅት ለስታርትአፖች ዕድገት ማነቆ የሆኑትን የፋይናንስ አቅርቦት፣ የሥራና ማምረቻ ቦታ፣ የገበያ ትስስር እና የብድር ዋስትና የመሳሰሉ ተግዳሮቶችን ለመቅረፍና ምቹ የፈጠራ ሥነ-ምህዳር ለመገንባት የሁሉንም አካላት የተቀናጀ ተሳትፎ ይጠይቃል።
ውድድሩን በፋይናንስ የደገፈው SNV በቀጣይም የፋይናንስ፣ የቢዝነስ ልማት (BDS) እና ሌሎች ዘርፈ-ብዙ ድጋፎችን ማድረጉን የሚቀጥል ሲሆን፤ ሚኒስቴሩም የስታርትአፕ አዋጅን እና የ”ዲጂታል ኢትዮጵያ” ስትራቴጂን ስኬታማ ለማድረግ ከፖሊሲ አውጪዎች፣ ከፋይናንስ ተቋማትና ከአለም አቀፍ አጋሮች ጋር ያለውን ስልታዊ ቅንጅት አጠናክሮ እንደሚቀጥል ተገልጿል።

ኮሌጁ በዘርፉ የተደረገው ሪፎርም ተጨባጭ ውጤት እንዲያስመዘግብ ያስቻለው መሆኑን አስታወቀ
በአዲስ አበባ የልደታ ማኑፋክቸሪንግ ኮሌጅ የሥራና ክህሎት ሚኒስቴር በዘርፉ የቀረፀውን የሪፎርም አጀንዳ ወደ መሬት በማውረድ ተጨባጭ ሽግግር ውጤቶች ማስመዝገቡን አስታውቋል።
ኮሌጁ ባወጣው መረጃ፤ ስልጠናን ከገበያ ፍላጎትና ከተግባራዊ የኢንተርፕራይዝ ድጋፍ ጋር በማጣመር የተከናወኑ ተግባራት የጥቃቅንና አነስተኛ ኢንተርፕራይዞችን አቅም በመገንባት፣ ወደ መካከለኛና ከፍተኛ አምራችነት እያሸጋገረ ይገኛል።
የኮሌጁ የኢንዱስትሪ ኤክስቴንሽን እና ቴክኖሎጂ ልማት ምክትል ዲን አቶ ታከለ ኩሙላ እንደገለጹት፤ ተቋሙ የቴክኖሎጂ ሽግግር ስራዎችን በቀጥታ ከኢንዱስትሪዎች እና ከኢንተርፕራይዞች ተጨባጭ ፍላጎት በመነሳት እየሰራ ይገኛል።
በዚህም በተያዘው በጀት ዓመት ብቻ አስር አዳዲስ ቴክኖሎጂዎችን ሰርቶ ማሸጋገር መቻሉን ተመላክቷል፡፡
ኮሌጁ ባደረገው የውጤት ዳሰሳ ጥናት፤ ባለፈው ዓመት የተሸጋገሩ ቴክኖሎጂዎች ለኢንተርፕራይዞች ከ749 ሺህ ብር በላይ አዲስ ሀብት ማፍራት አስችለዋል፡፡ ይህንን ውጤት እስከ በጀት ዓመቱ ማብቂያ ድረስ ወደ አንድ ሚሊዮን ብር ለማሳደግ ታቅዶ እየተሰራ እንደሚገኝም ነው የተገለፀው፡፡
ኮሌጁ የስልጠናና ድጋፍ ስራዎቹን ከግል ተቀጣሪነት ወደ ስራ ፈጣሪነት በሚያሸጋግሩ የተግባራዊ ኢንኩቤሽን ማዕቀፎች ላይ ያተኮረ ነው ተብሏል፡፡
አሁን ላይ ኮሌጁ ለይቶ ከሚደግፋቸው 859 ኢንተርፕራይዞች መካከል 243ቱ ቀጣይነት ያለው የካይዘን፣ የቢዝነስ ማኔጅመንት እና የማርኬቲንግ ድጋፍ በየሳምንቱ እንደሚያገኙም የኮሌጁ መረጃ ያመለክታል።
ኮሌጅ በወጣው መረጃ፤ የዘርፉ አዲስ እሳቤ ሀገራዊ ምርትን ከማሳደግ፣ የውጭ ምንዛሬን ከመተካት እና ለወጣቶች የሥራ ዕድል ከመፍጠር አኳያ ተጨባጭና አመርቂ ውጤት እያመጣ ይገኛል፡፡ በመሆኑም ስትራቴጂውን ይበልጥ አጠናክሮ ለማስቀጠል በትኩረት ርብርብ እየተደረገ ይገኛል፡፡