bini

በክልሉ ያለውን እምቅ የመልማት አቅም በመጠቀም የህብረተሰቡን ሁለንተናዊ ተጠቃሚነት ማላቅ ይገባል፡፡
ክብርት ወ/ሮ ሙፈሪሃት ካሚል
የሥራና ክህሎት ሚኒስትር
የሥራና ክህሎት ሚኒስትር ክብርት ወ/ሮ ሙፈሪሃት ካሚል በአፋር ክልል እየተከናወኑ የሚገኙ የልማት ሥራዎችን በመመልከት ላይ ናቸው፡፡
በመስክ ምልከታው ኪልበቲ ረሱ አፍዴራ ወረዳ የጨው ፋብሪካዎችንና የአፍዴራ የጨው ሀይቅን ጨምሮ በክልሉ እየተከናወኑ ያሉ የልማት ሥራዎችን ጎብኝቷል።
በጉብኝቱ ላይ ክብርት ሚኒስትር ባስተላለፉት መልዕክት ክልሉ ከፍተኛ የሆነ የማዕድን ሀብት እና የቱሪዝም መስህቦች እንዳሉት ጠቅሰው ይህን እምቅ የመልማት አቅም በመጠቀም የህብረተሰቡን ሁለንተናዊ ተጠቃሚነት ማላቅ ይገባል ብለዋል፡፡
እሴት ሰንሰለትን መሰረት ባደረገው የሥራ ዕድል ፈጠራ አቅጣጫ የማዕድንና የቱሪዝም ዘርፉን ጨምሮ የክልሉ የልማት አቅሞች ለበርካታ የክልሉ ወጣቶች ሥራ መፍጠር እንደሚያስችሉ ጠቅሰዋል፡፡
ምርትና ምርታማነትን ሊያሳድጉ የሚችሉ ቴክኖሎጂዎችንና የአሰራር ስርዓቶችን ተግባራዊ በማድረግ የተጀመሩ ተስፋ ሰጪ የልማት ሥራዎችን የበለጠ ማስፋት እንደሚገባም ጠቁመዋል፡፡
ለዚህም የባለድርሻ እና አስፈፃሚ አካላት በቅንጅት መስራት ወሳኝ መሆኑን ያሳሰቡት ክብርት ሚኒስትር ምርትና ምርታማነትን ሊያሳድጉ የሚችሉ ቴክኖሎጂዎችንና የአሰራር ስርዓቶችን መጠቀም እንደሚገባም ገልፀዋል
ከልማት ሥራዎቹ ከጉብኝት በኋላም ከወረዳዎች፣ ዞኖችና የክልሉ አመራርና የህብረተሠብ ተወካዮች ጋር ውይይት አድርጓል።

ሚኒስቴሩ በውጭ ሀገር ሥራ ስምሪት ከሳውዲ አረቢያ የሰው ሃይል አስተዳዳር ተወካዮች ጋር ውይይት አካሄደ
የሥራና ክህሎት ሚኒስቴር የአሠሪና ሠራተኛ ጉዳይ ዘርፍ ሚኒስትር ዲኤታ ክቡር አቶ ዳንኤል ተሬሳ ከተወካዮቹ ጋር ተወያይተዋል፡፡
ውይይቱ በውጭ ሀገር የሥራ ሥምሪት ዘርፍ በኢትዮጵያ እና በሳውዲ አረቢያ መካከል የተፈረመውን የሁለትዮሽ ስምምነት አተገባበርና የቀጣይ አቅጣጫ ላይ ያተኮረ ነው፡፡
የዜጎችን መብት ደህንነትና ተጠቃሚነት ማረጋገጥን ዓላማው ባደረገው የውጭ ሀገር ሥራ ስምሪት ከምዝገባ ጀምሮ እስከ ስልጠናና ምዘና ድረስ የዜጎችን ፍትሃዊ ተጠቃሚነት ለማረጋገጥ በቴክኖሎጂ ታግዞ እየተከናወኑ ያሉ ስራዎችን ክቡር አቶ ዳንኤል ተሬሳ አብራርተዋል፡፡
ሥራውን ይበልጥ ለማዘመንና ከብልሹ አሰራር በማጽዳት ብቁና ተወዳዳሪ ዜጎችን ለሥራ ገበያው ለማቅረብ ከሚመለከታቸው አካላት ጋር እየሰራ መሆኑን የጠቀሱት ክቡር ሚኒስትር ዴታው ከሳውዲ አረቢያ የሰው ሃይል አስተዳዳር ተወካዮች ጋር የተጀመረው ተቀራርቦ የመስራት ሥራ ተጠናክሮ እንደሚቀጥል ጠቁመዋል፡፡
የሳውዲ አረቢያ ተወካዮች በበኩላቸው እየተከናወኑ ያሉ ሥራዎችን አድንቀው ከመነሻ እስከ መዳረሻ ድረስ ያለውን ሂደት ጤናማ በማድረግ በርካታ ዜጎችን ተጠቃሚ ለማድረግ ተቀራርቦ ለመስራት ዝግጁ መሆናቸውን ገልፀዋል፡፡

የቱሪዝም ማሰልጠኛ ኢንስቲትዩት ከውጭ ሀገር ሥራ ስምሪት አኳያ ያለውን የገበያ ፍላጎት ለማሟላት በትኩረት እየሰራ መሆኑን አስታወቀ፡፡
ኢኒስቲትዩቱ ለሥራ ገበያ ፍላጎት ምላሽ ለመስጠትና የዜጎችን ተጠቃሚነት ለማስፋት የአሰልጣኞች ስልጠና እየሰጠ ይገኛል፡፡
በሥልጠናው የመክፈቻ መርሃ ግብር ላይ መልዕክት ያስተላለፉት የተቋሙ ዋና ዳይሬክተር አቶ ጌታቸው ነጋሽ እንደገለጹት፤ የሚሰጠው የአቅም ግንባታ ስልጠና በውጭ ሀገር ስራ ስምሪት ተጠቃሚ የሚሆኑ ዜጎች ተወዳዳሪና የተሻለ ተጠቃሚ እንዲሆኑ ማድረግ የሚያስችል ነው።
የሥራና ክህሎት ሚኒስቴር የውጭ ሀገር ሥራ ስምሪቱ የዜጎችን መብት ደህንነትና ተጠቃሚነት ባረጋገጠ መልኩ እንዲሆን አቅጣጫ አስቀምጦ ተግባራዊ እየተደረገ ሲሆን በዚህ መሰረትም ኢኒስቲትዩቱ እስካሁን ለበርካታ ዜጎች ተግባር ተኮር ሥልጠናዎችን መስጠት ችሏል፡፡
ከዚህ በተጨማሪ በዘርፉ ላለው የሥራ ገበያ ፍላጎት ምላሽ ለመስጠትና የዜጎችን ተጠቃሚነት ለማስፋት የአሰልጣኞች ስልጠና እየሰጠ እንደሚገኝም ተመላክቷል፡፡
በስልጠናው ከተለያዩ ክልሎች የተወጣጡ የፖሊቴክኒክ ኮሌጅ አሰልጣኞች እንደተካፈሉም ገልፀዋል፡፡
በዚህ በጀት አመት 150 ሰልጣኞች በሦስት ዙሮች የሰለጠኑ ሲሆን የተሰጠው ሥልጠና በምግብና መጠጥ መስተንግዶ፣ በቤት አያያዝ እና በምግብ ዝግጅት ላይ ያተኮረ ተግባር ተኮር መሆኑንና ኢንስቲትዩቱ የሚሰጠውን ስልጠና በቀጣይም አጠናክሮ እንደሚቀጥል የተቋሙ አመራሮች ጠቁመዋል፡፡
የኢንስቲትዩቱ የሥልጠና እና የተቋማት አቅም ግንባታ ዴስክ ሀላፊ አቶ ተመስገን በቀለ በሦስተኛው ዙር የአሰልጣኞች ስልጠና ላይ ባስተላለፉት መልዕክት፤ ስልጠናውን ያገኙ አሰልጣኞች ወደ ተቋማቸው ሲመለሱ እንደሀገር የተሰጣቸውን ኃለፊነት እንዲወጡ አሳስበዋል፡፡

ኢንስቲትዩቱ ያቋቋመውን የአካል ጉዳተኞች ማዕከል ሥራ አስጀመረ
የኢፌዴሪ ቴክኒክና ሙያ ሥልጠና ኢንስቲትዩት ያቋቋመውን የአካል ጉዳተኞች ማዕከል ሥራ አስጀምሯል፡፡
በማስጀመሪያ መርሃ ግብሩ የኢንስቲትዩቱ ዋና ዳይሬክተር ዶ/ር ብሩክ ከድርን ጨምሮ የኢንስቲትዩቱ አመራርና ሠራተኞች ተገኝተዋል፡፡
ዶ/ር ብሩክ ከድር ባስተላለፉት መልዕክት የቴክኒክና ሚያ ሥርዓቱን አካታች ማድረግ ምቹ ሁኔታ ከመፍጠር ባሻገር በኢትዮጵያ ሁለንተናዊ ልማት ውስጥ ሁሉም ዜጎች ተሳታፊና ተጠቃሚ የሚሆኑበትን ዕድል ይፈጥራል ብለዋል፡፡
ሥራ ያስጀመርነው ይህ ማዕከል ኢንስቲትዩቱ ለአካል ጉዳተኞች ምቹ የሥልጠና ማዕከል ለመሆን ያለው ቁርጠኝነት ማሳያ እንደሆነም ገልፀዋል።
በኢንስቲትዩቱ ውስጥ አካል ጉዳተኝነት ከውጤታማነት ያላገዳቸው አሠልጣኞች፣ ተመራማሪዎች እና ቴክኖሎጂስቶች መኖራቸውን ጠቁመዋል፡፡
በትምህርትና ሥልጠናው መስክ ማዕከሉ ለአካል ጉዳተኞች ምቹ ሁኔታን የሚፈጥር ከመሆኑም በላይ ከሌሎች ልምድና ተሞክሮዎችን የሚቀስሙበት ቦታም እንደሆነ በመድረኩ ላይ ተመላክቷል፡፡

የሥራና ክህሎት ሚኒስቴር ከተባበሩት መንግስታት ዓለም አቀፍ የንግድ ማዕከልና ከሌሎችም ባለድርሻ አካላት ጋር በመተባበር ዲጂታል ቴክኖሎጂን በመጠቀም ለዜጎች ሰፊ ሥራ ዕድልን ለመፍጠር በሚያስችሉ አማራጮች ላይ ያተኮረ የምክክር መድረክ አካሂዷል፡፡
መድረኩን በንግግር የከፈቱት የሥራና ክህሎት ሚኒስቴር የሥራ፣ ሥራ ሥምሪትና ገበያ ዘርፍ ሚኒስትር ዴኤታ ክቡር አቶ ሰለሞን ሶካ ባስተላለፉት መልዕክት ዲጂታል ኢኮኖሚን በመጠቀም ዘላቂ ልማትንና ሁለንተናዊ ብልፅግናን ለማረጋገጥ ሀገራችን ‹‹ የዲጂታል ኢትዮጵያ 2025›› ግብን ቀርፃ ተግባራዊ እያደረገች ትገኛለች ብለዋል፡፡
የዲጂታላይዜሽን ሥርዓት በዓለም አቀፍ ደረጃ የዜጎችን ተወዳዳሪነት ለማጎልበት ያለውን አስተዋፅኦ መነሻ በማድረግ የሥራና ክህሎት ሚኒስቴር የዲጂታል ኢንተርፕሪነርሺፕ እንቅስቃሴን መጀመሩን የገለፁት ክቡር አቶ ሰለሞን ሶካ ሚኒስቴር መ/ቤቱ ባለማው የኢትዮጵያ የሥራ ገበያ መረጃ ሥርዓት አማካኝነት ቁጥራቸው ከ26ሺ ለሚልቁ ዜጎች የርቀት ሥራ(remote job) መፍጠር መቻሉን ተናግረዋል፡፡
እ.ኤ.አ በ2023 የዲጂታል ቴክኖሎጂን በመጠቀም ሰዎች ከሀገራቸው ሳይወጡ በተለያዩ ሀገራት በሚገኙ የሥራ መስኮች ላይ መሰማራት በሚያስችለው የአውትሶርሲንግ ቢዝነስ ከ1.2 ትሪሊዮን ዶላር በላይ መንቀሳቀሱ ዘርፉ ዜጎችን ተጠቃሚ ከማድረግ አንፃር ያለውን አቅም የሚያመላክት መሆኑም ተብራርቷል፡፡
ዘርፉ አዲስ እንደመሆኑ በሚጠበቀው ደረጃ ዜጎችን ተጠቃሚነት ለማረጋገጥ የህግ ማዕቀፍ ማዘጋጀትና የአሠራር ስርዓት መዘርጋት አስፈላጊ መሆኑን የገለፁት ክቡር ሚኒስትር ዴኤታው ምህዳሩን ምቹ ከማድረግ አንፃር የሥራና ክህሎት ሚኒስቴር የበኩሉን ድርሻ እየተወጣ እንደሚገኝም ጠቁመዋል፡፡
በመድረኩ ፖሊሲ አውጪዎች፣ የኢንዱስትሪ ባለቤቶች፣ ኢንተርፕረነሮችና ወጣቶችን ከአሠሪዎች የሚያግናኙ የቴክኖሎጂ ፕላትፎርም አልሚዎች ተሳታፊ የሆኑ ሲሆን በጊግ ኢኮኖሚ የቁርጥ ሥራ እና ፍሪላንሲንግ ኢንዱስትሪ ላይ በሚያተኩሩ አጀንዳዎች ላይ ውይይት ተካሂዷል፡፡

የሥራና ክህሎት ሚኒስትር ክብርት ወ/ሮ ሙፈሪሃት ካሚል ቪዥነሪ የምዘናና ሥልጠና ማዕከልን ጎበኙ
የክህሎት ልማት ሥራችን በሥራ ገበያው ፍላጎት ጀምሮ በሙያ ብቃት ምዘና የሚጠቃለል ነው፡፡
በመሆኑም ከክህሎት ስልጠናው ባልተናነሰ መልኩ ወደ ሥራ ገበያው የሚቀላቀለው የሰው ሃይል ብቃቱ የተረጋገጠ እንዲሆን የምዘና ስርዓቱ ወቅቱን በዋጀ ቴክኖሎጂ የሚደገፍ እና ቀጣሪ ድርጅቶችም ለሚሰጠው የምዘና ማረጋገጫ ሰርተፊኬት ዋጋ እንዲሰጡት በትኩረት እየተሰራበት ይገኛል፡፡
ከዚህ ጎን ለጎን ዓለም አቀፍ የሥራ ገበያውን ለመጠቀም በምናደርገው ጥረት ዓለም አቀፍ እውቅና ያላቸው ተቋማት የሚሰጡት የሙያ ብቃት ማረጋገጫ ወሳኝ በመሆኑ እነዚህ ተቋማት ለዜጎቻችን ተደራሽ የሚሆኑበትን ምቹ ሁኔታ ለመፍጠር የሥራና ክህሎት ሚኒስቴር ጥረት ሲያደርግ ቆይቷል፡፡
በዚህም ቪዥነሪ የምዘናና ሥልጠና ማዕከል ዓለም አቀፍ እውቅና ካላቸው የምዘና ተቋማት ጋር በመተባበር የከፈተውን የምዘና ማዕከል የሥራና ክህሎት ሚኒስትር ክብርት ወ/ሮ ሙፈሪሃት ካሚል ጎብኝተዋል፡፡
ከማዕከሉ የሥራ አመራሮች ጋር በምዘና፣ ስልጠናና እና የቀጣይ አቅጣጫዎች ዙሪያም ውይይት አካሂደዋል፡፡
በውይይቱ ማዕከሉ በዚህ መልኩ ሥራ መጀመሩ በውጭ ሀገር ያሉ የሥራ ዕድሎችን ከማስፋት ባሻገር በትምህርትና ሥልጠናው መስክ ሙያዊ እድገትንና የዕድሜ ልክ ትምህርትን የሚያበረታታ እንዲሁም እንደ ሀገር ያለንን ተወዳዳሪነትን የሚጨምር እንደሆነ ተመላክቷል፡፡ በመስኩ የግሉ ዘርፍ ሚናም ከፍተኛ እንደሆነ ተጠቁሟል::

በሴቶች እና ህጻናት ላይ የሚደርሱ ጥቃቶችን በጋራ መከላከል እንደሚገባ ተጠቆመ
በህዳር ወር የሚከበሩት የሴቶችና የህጻናት፣ የአረጋውያን እና የኤች አይቪ ኤድስ ቀን በሥራና ክህሎት ሚኒስቴር ተከብሯል፡፡
በመድረኩ የተለያዩ የግንዛቤ ማስጨበጫ መርሃ ግብሮች ተካሂደዋል፡፡
የሥራና ክህሎት ሚኒስቴር የሴቶችና ማህበራዊ ጉዳይ አካቶ ትግበራ ሥራ አስፈጻሚ ወ/ሮ እርቅነሽ ዮሐንስ ባስተላለፉት መልዕክት ሴቶችና ህጻናት ከሃገሪቱ ህዝብ ከፍተኛውን ቁጥር እንደሚይዙ ገልጸው በእነዚህ የህብረተሰብ ክፍሎች ላይ የሚደርሱ ጥቃቶችን ለመከላከል ከግለሰብ ጀምሮ ሁሉም የህብረተሰብ ክፍል በየደረጃው በጋራ መቆም ይገባል፡፡
አካል ጉዳተኞች ያላቸውን እምቅ አቅም አውጥተው እንዲጠቀሙ ማገዝ፣ የክህሎት ባለቤት እንዲሆኑ ስልጠና እንዲያገኙ ማስቻል እና የሥራ ዕድል ተጠቃሚ እንዲሆኑ መስራት ከሁሉም ዜጋ ይጠበቃል ብለዋል፡፡
በተመሳሳይ ኤች አይቪ ኤድስ አምራች ዜጎችን እየቀጠፈ የሚገኝ በመሆኑ ከመዘናጋት መውጣት እና ጥንቃቄ ማድረግ እንደሚገባም አስገንዝበዋል፡፡

የሥራና ክህሎት ሚኒስቴር ሚኒስትር ክብርት ሙፈሪሃት ካሚል በኢትዮጵያ የካናዳ አምባሳደር ክቡር ጆሿ ታባህ ጋር ውጤታማ ውይይት አካሄዱ።
በውይይታቸውም ኢትዮጵያ በክህሎት ልማት፣ ሥራ ዕድል ፈጠራ እና ሰላማዊ የኢንዱስትሪ ግንኙነት ላይ ያከናወነችውን ሪፎርም በዝርዝር ተመልክተዋል።
በዚህም ካናዳ ክህሎት ልማትና ሥራ ዕድል ፈጠራን ጨምሮ በቀጣይ በሚለዩ መስኮች ከኢትዮጵያ ጋር በትብብር ለመስራት ቁርጠኛ መሆኗን አረጋግጠውልኛል ብለዋል ክብርት ሙፈሪሃት ፡፡
ኢትዮጵያ እና ካናዳ ከግማሽ ምዕተ ዓመት የተሻገረ ግንኙነት ያላቸው ሲሆን በዘርፉ የሚደረገው ትብብርም ግንኙነቱን ወደ ላቀ ደረጃ የሚያሸጋግርና የጋራ ተጠቃሚነትን የሚያረጋግጥ ነው፡፡
በኢትዮጵያ የካናዳ አምባሳደር ክቡር ጆሿ ታባህ እና የሥራ ባልደረቦቻቸው በትብብር ለመስራት ላሳዩት ቀርጠኝነት ከብርት ሚኒስትር ሙፈሪሃት ምስጋና አቅርበዋል፡፡